މަސްވެރިންގެ ޤައުމީ ދަފްތަރުގައި މިހާތަނަށް 305 އުޅަނދު ރަޖިސްޓްރީކޮށްފައިވާކަމަށް މަސްވެރިކަމާއި ކަނޑުގެ ވަސީލަތްތަކާ ބެހޭ ވުޒާރާއިން ހާމަކޮށްފިއެވެ. މި ދަފްތަރު އިފްތިތާޙުކޮށްފައިވަނީ މިދިޔަ އަހަރުގެ ފެބްރުއަރީ 16 ވަނަ ދުވަހުއެވެ.
މަސްވެރިކަމާއި ކަނޑުގެ ވަސީލަތްތަކާ ބެހޭ ވުޒާރާއިން ބުނީ މި ދަފްތަރުގެ މައިގަނޑު މަޤްޞަދަކީ މަސްވެރިކަން ރަސްމީ ވަޒީފާއަކަށް ހެދުން ކަމަށެވެ. މީގެ ސަބަބުން، މަސްވެރިކަމުގެ ދާއިރާގައި މަސައްކަތްކުރާ ބިދޭސީންގެ ސަބަބުން ބޭރުވާ ފައިސާ ރާއްޖޭގައި ހިފެހެއްޓޭނެ ކަމަށް ވުޒާރާއިން ފާހަގަކުރިއެވެ.
މީގެ އިތުރުން، މި ދަފްތަރުގެ ޒަރީއާއިން އެހެނިހެން މަސްވެރިކަމުގެ މަޢުލޫމާތުވެސް ނެގޭނެ ކަމަށް ވުޒާރާއިން ހާމަކުރިއެވެ. މިގޮތުން، މަސްވެރިކަމުގެ ދާއިރާގައި ހަރަކާތްތެރިވާ އުޅަނދުފަހަރުގެ އަދަދާއި، މަސްވެރިންގެ އަދަދު، އަދި އެހެނިހެން މުހިންމު ތަފާސްހިސާބުތައް ބެލެހެއްޓޭނެއެވެ.
މަސްވެރިންގެ ޤައުމީ ދަފްތަރަކީ ރައީސް މުޙައްމަދު މުއިއްޒުގެ ވަޢުދެއްކަން ފާހަގަކޮށްލެވެއެވެ. މި ދަފްތަރު އުފެއްދުމުގެ މަޤްޞަދަކީ މަސްވެރިކަމުގެ ދާއިރާ ހަރުދަނާކޮށް، މަސްވެރިންނަށް އިތުރު ރައްކާތެރިކަމާއި ޙައްޤުތައް ކަށަވަރުކޮށްދިނުމެވެ.
މި ދަފްތަރުގައި ރަޖިސްޓްރީވުމުން، މަސްވެރިންނަށް ލިބޭ ފައިދާތަކުގެ ތެރޭގައި ރަސްމީ ވަޒީފާގެ ގޮތުގައި މަސްވެރިކަން ބެލެވުމާއި، އިޖްތިމާޢީ ރައްކާތެރިކަމުގެ ޚިދުމަތްތައް ލިބުން ހިމެނެއެވެ. މި ދަފްތަރުގެ ސަބަބުން މަސްވެރިކަމުގެ ދާއިރާ އިތުރަށް ކުރިއަރައި، ދިވެހި އިޤްތިޞާދަށް ފައިދާކުރާނެ ކަމަށް ސަރުކާރުން އުންމީދުކުރެއެވެ.
