ޗައިނާ ސަރުކާރުން ދިވެހިރާއްޖެއަށް 80 ކޮންޕިޔުޓަރާއި 20 ލެޕްޓޮޕް ހަދިޔާކޮށްފިއެވެ.
ޚާރިޖީ ވުޒާރާގައި ބޭއްވުނު ރަސްމިއްޔާތެއްގައި މިކަމުގެ އެއްބަސްވުމުގައި ސޮއިކުރެއްވީ ދިވެހިރާއްޖޭގެ ޚާރިޖީ ވަޒީރު ޑރ. ޢަބްދުﷲ ޚަލީލާއި ދިވެހިރާއްޖޭގައި ހުންނަ ޗައިނާގެ ސަފީރު ވަންގް ލިޒިންއެވެ.
މި ރަސްމިއްޔާތުގައި ވާހަކަފުޅު ދައްކަވަމުން ޚާރިޖީ ވަޒީރު ޑރ. ޢަބްދުﷲ ޚަލީލް ވިދާޅުވީ މި ހަދިޔާއިން ރާއްޖޭގެ ޓެކްނިކަލް ދާއިރާ ކުރިއަރައި، ޑިޖިޓަލް ޚިދުމަތްތައް ތަރައްޤީވާނެ ކަމަށެވެ. އަދި މިއީ ދެ ޤައުމުގެ ގާތްގުޅުމުގެ ރަމްޒެއްކަމަށް ވެސް އެމަނިކުފާނު ފާހަގަކުރެއްވިއެވެ.
"މި ހަދިޔާއަކީ ދިވެހިރާއްޖެއާއި ޗައިނާއާ ދެމެދު އޮތް ގާތްގުޅުމުގެ ހެއްކެކެވެ. މި ކޮންޕިޔުޓަރުތަކާއި ލެޕްޓޮޕްތަކުން ރާއްޖޭގެ ޑިޖިޓަލް ވަސީލަތްތައް އިތުރަށް ހަރުދަނާވެ، ސަރުކާރުގެ ޚިދުމަތްތައް ފޯރުކޮށްދިނުމުގައި ބޮޑު ކުރިއެރުމެއް ލިބިގެންދާނެ," ޑރ. ޚަލީލް ވިދާޅުވިއެވެ.
ޚާރިޖީ ވަޒީރު އިތުރަށް ވިދާޅުވީ ޗައިނާ ސަރުކާރުން ދެއްވާ އެހީތެރިކަމަށް ދިވެހި ސަރުކާރުގެ ނަމުގައި ޝުކުރު އަދާކުރައްވާ ކަމަށެވެ. އަދި ކުރިއަށް އޮތް ތަނުގައިވެސް ދެ ޤައުމުގެ ގުޅުން އިތުރަށް ބަދަހިވެގެންދާނެ ކަމުގެ ޔަޤީންކަން ވެސް އެމަނިކުފާނު ފާޅުކުރެއްވިއެވެ.
ޗައިނާގެ ސަފީރު ވަންގް ލިޒިން ވިދާޅުވީ މި ހަދިޔާއަކީ ދެ ޤައުމުގެ ދެމެދުގައި އޮތް އެކުވެރިކަމުގެ ގުޅުން އިތުރަށް ހަރުދަނާކުރުމަށް އެޅޭ އިތުރު ފިޔަވަޅެއް ކަމަށެވެ. އަދި ދިވެހިރާއްޖޭގެ ތަރައްޤީއަށް އެހީތެރިވުމަށް ޗައިނާ ސަރުކާރުން އަބަދުވެސް ތައްޔާރަށް ތިބޭނެ ކަމުގެ ޔަޤީންކަން ދެއްވިއެވެ.
ޗައިނާއިން ރާއްޖެއަށް 80 ކޮންޕިޔުޓަރާއި 20 ލެޕްޓޮޕް ހަދިޔާކޮށްފި
