މިނިސްޓްރީ އޮފް ކޮންސްޓްރަކްޝަން އެންޑް އިންފްރާސްޓްރަކްޗަރގެ ޓެކްނިކަލް ޓީމުން މާލެ އަދި ވިލިމާލޭގެ މަގުތަކުގެ ހާލަތު ދެނެގަތުމަށްޓަކައި އެމްއެންޑީއެފް، އާރްޑީސީ އަދި މޯލްޑިވްސް ޕޮލިސް ސަރވިސްއާއެކު ބައްދަލުވުންތަކެއް ބާއްވައިފިއެވެ.
މި ބައްދަލުވުންތަކުގައި ޗައިނާ ސަރުކާރުން މަގުހެދުމުގެ މަޝްރޫއުއަށް ޢައްޔަންކޮށްފައިވާ މާހިރުންގެ ޓީމުވެސް ބައިވެރިވެފައިވެއެވެ. މި ބައްދަލުވުންތަކަކީ މާލެ އަދި ވިލިމާލޭގެ މަގުތައް އަލުން ތަރައްޤީކުރުމުގެ މަޝްރޫޢުގެ ދަށުން ކުރިއަށްގެންދާ މަސައްކަތްތަކުގެ ތެރެއިން ބޭއްވުނު ބައްދަލުވުންތަކެކެވެ.
މި މަޝްރޫޢުގެ ފީސިބިލިޓީ ސްޓަޑީ 2024 ވަނަ އަހަރުގެ ނޮވެމްބަރ 21 ވަނަ ދުވަހާ ހަމައަށް ކުރިއަށްދާނެކަމަށް މިނިސްޓްރީން މަޢުލޫމާތު ދީފައިވެއެވެ. މި މަޝްރޫޢުގެ ދަށުން މާލެ އަދި ވިލިމާލޭގެ މަގުތަކުގެ މިހާރުގެ ހާލަތު ދެނެގަނެ، އެ މަގުތައް އަލުން ތަރައްޤީކުރުމަށް ބޭނުންވާ ކަންކަން ފާހަގަކުރެވޭނެއެވެ.
މީގެ އިތުރުން، މަގުތަކުގެ ސަލާމަތާއި ރައްކާތެރިކަން އިތުރުކުރުމަށް އެޅިދާނެ ފިޔަވަޅުތަކާއި ގުޅޭގޮތުންވެސް މަޝްވަރާކުރެވޭނެއެވެ. މި މަޝްރޫޢަކީ ޗައިނާ ސަރުކާރުގެ ހިލޭ އެހީގެ ދަށުން ކުރިއަށް ގެންދިއުމަށް ހަމަޖެހިފައިވާ ޕްރޮޖެކްޓެކެވެ.
ހަބަރު: ސަރުކާރު
