ހުޅުމާލޭގެ ދެވަނަ ފިޔަވަހީގެ 32 ފްލެޓް ޓަވަރުގެ ކޮމަރޝަލް ޔުނިޓުތައް ކުއްޔަށް ދޫކުރުމަށް އަވަހަށް ހުޅުވާލާނެ ކަމަށް ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) އިން މިއަދު ހާމަކޮށްފިއެވެ.
އެޗްޑީސީގެ ފަރާތުން މަޢުލޫމާތު ދެއްވި ގޮތުގައި، މި ކޮމަރޝަލް ޔުނިޓުތައް ހުންނާނީ ކޮންމެ ޓަވަރެއްގެ ތިރީ ބައިގައި އަދި ފުރަތަމަ ފަންގިފިލާގައެވެ. ޖުމްލަ 127 ޖާގަ ކުއްޔަށް ދޫކުރެވޭނެއެވެ. ފުރަތަމަ ހުޅުވާލެވޭނީ ޒޯން 1 ގެ ޓަވަރުތަކުގެ ޔުނިޓުތައް ކަމަށާއި، މިކަން އަންނަ ހަފްތާގައި ކުރިއަށް ގެންދާނެ ކަމަށް އެޗްޑީސީން ބުނެފައިވެއެވެ.
މި ކޮމަރޝަލް ޖާގަތައް އެކި ބޭނުންތަކަށް ޚާއްސަކުރެވިފައި ހުންނާނެ ކަމަށް އެޗްޑީސީން ހާމަކޮށްފައިވެއެވެ. މިގޮތުން، 5 މިނެޓުގެ ދުރުމިނުގައި ކާބޯތަކެތީގެ ފިހާރަތަކާއި މާޓުތައް ހުންނާނެއެވެ. 10 މިނެޓުގެ ދުރުމިނުގައި ޞިއްޙީ ޚިދުމަތްދޭ މަރުކަޒުތައް ޤާއިމްކުރެވޭނެއެވެ. އަދި 20 މިނެޓުގެ ދުރުމިނުގައި ޒުވާނުންގެ ސެންޓަރުތަކާއި އޮފީސް ޖާގަތައް ހުންނާނެއެވެ. މީގެ އިތުރުން، ކެފޭތަކާއި ރެސްޓޯރަންޓުތަކަށްވެސް ޖާގަ ކަނޑައެޅިފައިވާ ކަމަށް އެޗްޑީސީން ބުނެފައިވެއެވެ.
އެޗްޑީސީގެ ސްޕޯކްސްޕަރސަން ވިދާޅުވި ގޮތުގައި، މި މަޝްރޫޢުގެ މައިގަނޑު އަމާޒަކީ ފްލެޓުތަކުގައި މީހުން ދިރިއުޅެން ފެށުމުގެ ކުރިން ޒަރޫރީ ޚިދުމަތްތައް ޤާއިމްކުރުމެވެ. "މިއީ ރައްޔިތުންނަށް ފަސޭހަކަމާއެކު ދިރިއުޅެވޭނެ މާޙައުލެއް ޤާއިމްކުރުމަށް އަޅުގަނޑުމެން ކުރަމުންދާ މަސައްކަތުގެ ބައެއް," އެ ފަރާތުން ވިދާޅުވިއެވެ.
މި މަޝްރޫޢާ ގުޅޭ އިތުރު މަޢުލޫމާތު ކުރިއަށް އޮތް ދުވަސްތަކުގައި ހާމަކުރާނެ ކަމަށް އެޗްޑީސީން ބުނެފައިވެއެވެ.
ހުޅުމާލޭގެ ދެވަނަ ފިޔަވަހީގެ 32 ފްލެޓް ޓަވަރުން 127 ކޮމަރޝަލް ޔުނިޓް ކުއްޔަށް ދޫކުރަން ހުޅުވާލަނީ
