ތިލަފުށީގައި އިއްޔެ ހިންގި ޚާއްސަ އޮޕަރޭޝަނެއްގައި ގަވާއިދާ ޚިލާފަށް އުޅުނު 33 ބިދޭސީން އިމިގްރޭޝަނުގެ ބެލުމުގެ ދަށަށް ގެންގޮސްފިއެވެ.
އިމިގްރޭޝަނުން މިއަދު ނެރުނު ނޫސްބަޔާނެއްގައި ބުނެފައިވަނީ މި އޮޕަރޭޝަނުގައި ހައްޔަރުކުރެވުނު މީހުންގެ ތެރޭގައި ފުޅާ ދާއިރާއެއްގައި ވިޔަފާރިކުރި ބަޔަކުވެސް ހިމެނޭ ކަމަށެވެ.
އިމިގްރޭޝަނުން އިތުރަށް ހާމަކޮށްފައިވާ ގޮތުގައި، ގަވާއިދާ ޚިލާފު ބިދޭސީންގެ މައްސަލަ ހައްލުކުރުމަށް ސަރުކާރުން ޚާއްސަ މަސައްކަތްތަކެއް ކުރަމުންދެއެވެ. މިގޮތުން "އިމިގްރޭޝަން ވޮޗް" ޕްލެޓްފޯމް ޤާއިމުކުރެވި، އެތައް އޮޕަރޭޝަނަކާއި ރެއިޑްތަކެއް ކުރިއަށް ގެންދެވިފައިވާ ކަމަށް އެ އިދާރާއިން ބުނެފައިވެއެވެ.
މި މަސައްކަތުގެ ނަތީޖާއެއްގެ ގޮތުން، މިދިޔަ އަހަރު 5000 އަށްވުރެ ގިނަ ބިދޭސީން އަނބުރާ އެމީހުންގެ ޤައުމުތަކަށް ފޮނުވާލެވިފައިވާކަން އިމިގްރޭޝަނުން ފާހަގަކޮށްފައިވެއެވެ. އަދި ކުރިއަށް އޮތް ތަނުގައިވެސް މިފަދަ އޮޕަރޭޝަންތައް ހަރުދަނާކޮށް ކުރިއަށް ގެންދާނެކަމަށް އެ އިދާރާއިން ބުނެފައިވެއެވެ.
ގަވާއިދާ ޚިލާފަށް ރާއްޖޭގައި ދިރިއުޅޭ ބިދޭސީންގެ މައްސަލައަކީ ގިނަ ދުވަސްތަކެއް ވަންދެން ދިވެހި މުޖުތަމަޢުގައި ދެކެވެމުން އަންނަ ވާހަކައެކެވެ. މި މައްސަލަ ހައްލުކުރުމަށް ސަރުކާރުން އަޅަމުންދާ ފިޔަވަޅުތަކާ ގުޅިގެން ރައްޔިތުންގެ ތެރެއިން ގިނަ ބަޔަކު އުފާވެފައިވާކަން ފާހަގަކުރެވެއެވެ.
