"ކޮންމެ ކުއްޖަކަށް އާއިލާއެއް" ޕްރޮގްރާމްގެ ދަށުން މިހާތަނަށް 54 ކުއްޖަކު އާއިލާތަކާ ޙަވާލުކޮށްފައިވާކަމަށް އިޖުތިމާޢީ އަދި ޢާއިލީ ތަރައްޤީއާ ބެހޭ ވަޒީރު ޑރ. ޢާއިޝަތު ޝިހާމް ވިދާޅުވެއްޖެއެވެ.
ސަރުކާރަށް 1 އަހަރު ފުރުމާ ގުޅިގެން ޕީއެސްއެމް ނިއުސްއިން ގެނެސްދޭ "ހަފްތާ 52" ގެ ޚާއްސަ ޕްރޮގްރާމުގައި ވާހަކަފުޅު ދައްކަވަމުން ވަޒީރު ވިދާޅުވީ، މި ޕްރޮގްރާމްގެ މައިގަނޑު މަޤްޞަދަކީ ކޮންމެ ކުއްޖަކަށްވެސް އާއިލީ ލޯތްބާއި އޯގާތެރިކަން ލިބިދިނުން ކަމަށެވެ.
ޑރ. ޝިހާމް އިތުރަށް ވިދާޅުވި ގޮތުގައި، މި ޕްރޮގްރާމްގެ ދަށުން ދައުލަތުގެ ބެލުމުގެ ދަށުގައިވާ ކުދިން އަމިއްލަ އާއިލާއާ ނުވަތަ އާ އާއިލާއަކާ ޙަވާލުކުރެވެއެވެ. އަދި ފޯސްޓަރ އާއިލާތަކަށް ކުދިން ބެލުމަށް މަހަކު 5,000 ރުފިޔާ ދެވޭ ކަމަށްވެސް އެ މަނިކުފާނު ވިދާޅުވިއެވެ.
"ކުދިން އާއިލާއާ ޙަވާލުކުރުމަށްފަހު، އެ ކުދިންގެ ޙާލަތު ގަވާއިދުން ބަލަމުން ގެންދަން. އަދި އެ ކުދިންގެ ތަޢުލީމާއި ވަޒީފާގެ ފުރުޞަތުތައް ފަހިކޮށްދިނުމަށް މަސައްކަތްކުރަން،" ވަޒީރު ވިދާޅުވިއެވެ.
މީގެ އިތުރުން، މި މަސައްކަތް އިތުރަށް ހަރުދަނާކުރުމަށްޓަކައި "ސްޓޭޓް ކެއަރ ސަރވިސަސް" ނަމުގައި ޚާއްޞަ ޑިޕާޓްމަންޓެއް އުފައްދާފައިވާ ކަމަށްވެސް ޑރ. ޝިހާމް ހާމަކުރެއްވިއެވެ.
"ކޮންމެ ކުއްޖަކަށް އާއިލާއެއް" ޕްރޮގްރާމަކީ ދައުލަތުގެ ބެލުމުގެ ދަށުގައިވާ ކުދިންނަށް އާއިލީ މާޙައުލެއް ފޯރުކޮށްދިނުމަށް ސަރުކާރުން ފަށާފައިވާ ޕްރޮގްރާމެކެވެ. މި ޕްރޮގްރާމްގެ ސަބަބުން ގިނަ ކުދިންތަކަކަށް އާއިލީ ލޯތްބާއި އޯގާތެރިކަން ލިބިގެންދާނެ ކަމަށް އުންމީދުކުރެވެއެވެ.
"ކޮންމެ ކުއްޖަކަށް އާއިލާއެއް" ޕްރޮގްރާމްގެ ދަށުން 54 ކުއްޖަކު އާއިލާއާ ޙަވާލުކޮށްފި
