ހުރިހާ ރައްޔިތުންގެ ސަލާމަތަށް މި ސަރުކާރުން މަސައްކަތްކުރާނެ ކަމަށް ދާޚިލީ ސަލާމަތާއި ފަންނިއްޔާތާބެހޭ ވަޒީރު ޢަލީ އިޙްސާން ވިދާޅުވެއްޖެއެވެ.
ވަޒީރު މިހެން ވިދާޅުވީ އެމްޑީޕީގެ ޗެއަރޕާސަން ފައްޔާޒު އިސްމާއިލް ސޯޝަލް މީޑިއާގައި ކުރެއްވި ޕޯސްޓަކާ ގުޅިގެންނެވެ.
ފައްޔާޒު އިސްމާއިލް ވިދާޅުވެފައިވަނީ، ޓްވީޓް ކުރާތީ ފުލުސް އޮފީހަށް ހާޒިރުވާން މީހަކަށް އަންގާފައިވާ ކަމަށާއި، މިއީ ސަރުކާރާ ދެކޮޅު ޚިޔާލު ފާޅުކުރުން ކުށަކަށް ހެދުން ކަމަށެވެ.
މިކަމާ ގުޅޭގޮތުން ވަޒީރު ޢަލީ އިޙްސާން ވިދާޅުވީ، ފައްޔާޒު ވިދާޅުވި ޓްވީޓުގައި މީހަކަށް ގެއްލުން ދޭނެކަމަށް ދޭހަވާތީ، މިކަން ބަލަންޖެހޭ ކަމަށެވެ. އަދި ޤާނޫނުގެ ތެރެއިން ޚިޔާލު ފާޅުކުރުމުގެ މިނިވަންކަން އޮންނާނެ ކަމަށް ވެސް ވަޒީރު ވިދާޅުވިއެވެ.
"ކޮންމެ ކަމަކީ ސިޔާސީ ކުޅިވަރަކަށް ހެދުމަކީ ޒިންމާދާރު ކަމެއް ނޫން،" ވަޒީރު ވިދާޅުވިއެވެ. "އަޅުގަނޑުމެން މަސައްކަތް ކުރާނީ ހުރިހާ ރައްޔިތުންގެ ސަލާމަތާއި ރައްކާތެރިކަމަށް."
މި މައްސަލައިގައި އިތުރު ތަޙްޤީޤުތައް ކުރިއަށްދާނެ ކަމަށް ވަޒީރު ވިދާޅުވިއެވެ. އަދި ޤާނޫނާ ޚިލާފު އެއްވެސް ޢަމަލެއް ހިންގާފައިވާނަމަ، އެކަމާމެދު ފިޔަވަޅު އެޅޭނެ ކަމަށްވެސް ވިދާޅުވިއެވެ.
