ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) އިން ހުޅުމާލޭ ދެވަނަ ފިޔަވަހިން 10 ބިން ވިއްކުމަށް ބީލަން ހުޅުވާލައިފިއެވެ. މި ބިންތައް ވިއްކަނީ ހަމައެކަނި ދިވެހީންނަށެވެ.
އެޗްޑީސީން މިއަދު ނެރުނު ނޫސްބަޔާނެއްގައި ބުނެފައިވާ ގޮތުގައި، މި ބީލަމުގައި ބީޗް ފްރަންޓުން 3 ބިމާއި ބީޗް ސައިޑުން 7 ބިން ވިއްކާނެއެވެ. ބީޗް ފްރަންޓު ބިންތަކުގެ ބީލަން ފެށޭ އަގަކީ އަކަފޫޓަކަށް 4500 ރުފިޔާ ކަމަށާއި، ބީޗް ސައިޑުގެ ބިންތަކުގެ އަގަކީ އަކަފޫޓަކަށް 4000 ރުފިޔާ ކަމަށް ވަނީ ހާމަކޮށްފައެވެ.
މި ބީލަމުގައި ބައިވެރިވުމުގެ ފުރުޞަތު ލިބޭނީ 18 އަހަރުން މަތީގެ ދިވެހީންނާއި ސައްތައިން ސައްތަ ދިވެހި ކުންފުނިތަކަށެވެ. އެޗްޑީސީން ފާހަގަކޮށްފައިވާ ގޮތުގައި މި ބިންތައް ހުރީ ކިއޮސްކްތައް ހުރި ސަރަހައްދާ ކައިރި ހިސާބެއްގައެވެ.
އެޗްޑީސީން ކުރިންވެސް ވަނީ އެކި ބޭނުންތަކަށް ބިން ވިއްކުމަށް ހުޅުވާލާފައެވެ. މިފަހަރުގެ ބީލަމަކީ ހުޅުމާލޭ ދެވަނަ ފިޔަވަހީގެ ތަރައްޤީގެ މަޝްރޫޢުގެ ތެރެއިން ކުރިއަށްގެންދާ އަނެއް ބީލަމެވެ.
މި ބީލަމާ ގުޅޭ އިތުރު މަޢުލޫމާތު އެޗްޑީސީގެ ވެބްސައިޓުން ލިބެން ހުންނާނެ ކަމަށް އެ ކުންފުނިން ބުނެފައިވެއެވެ. ސުންގަޑިއާއި އެހެނިހެން ތަފްސީލުތައް ވެސް އެ ވެބްސައިޓުން ލިބެން ހުންނާނެއެވެ.
ހުޅުމާލޭ ދެވަނަ ފިޔަވަހިން 10 ބިން ވިއްކުމަށް ބީލަން ހުޅުވާލައިފި
