ކުރީ ސަރުކާރުގެ ޢަމަލުތަކުގެ ސަބަބުން މިހާރު ރާއްޖޭގެ ޖަލުތަކުގައި ޤައިދީން ތިބެނީ އޯވަރ ކެޕޭސިޓީގައި ކަމަށް ކޮމިޝަނަރ އޮފް ޕްރިޒަންސް ޙަސަން ޒަރީރު ވިދާޅުވެއްޖެއެވެ.
ކޮމިޝަނަރ ޒަރީރު ވިދާޅުވި ގޮތުގައި، ދަރުމަވަންތަ ސްކޫލް އެޅުމަށްޓަކައި މާލޭ ޖަލު އަވަހަށް ހުސްކުރަން ޖެހުނު ނަމަވެސް، މާފުށީ ޖަލުގައި ހަދަން ނިންމި 100 މީހުންގެ ގޮޅިތައް ސްކޫލް ހުޅުވިއިރުވެސް ނުނިމޭކަން ފާހަގަކުރެއްވިއެވެ. އަދި މި ސަރުކާރުން މާލޭ ޖަލު ބަންދުކޮށް، ޤައިދީން އެހެން ޖަލުތަކަށް ބަދަލުކުރި ކަމަށް ވިދާޅުވިއެވެ.
"ކުރީ ސަރުކާރުން ދޫނިދޫގައި ހުރި 150 މީހުންގެ ރިމާންޑު ޖަލު ތަޅާލި. މި ހުރިހާ ކަމަކުން ޖަލުތައް މިހާރު ހިންގަނީ އޯވަރ ކެޕޭސިޓީގައި،" ކޮމިޝަނަރ ޒަރީރު ވިދާޅުވިއެވެ.
ނަމަވެސް، މި ދަތި ޙާލަތުގައިވެސް ޤައިދީންނަށް އިޖްތިމާޢީ ޕްރޮގްރާމްތައް ހިންގަމުންދާ ކަމަށާއި، ޕެރޯލްގެ ޝަރުތު ފުރިހަމަވާ ޤައިދީން މުޖުތަމަޢަށް ނެރުމަށް މަސައްކަތްކުރަމުންދާ ކަމަށް ކޮމިޝަނަރ ޒަރީރު ވިދާޅުވިއެވެ. މީގެ އިތުރުން، ޖަލުގައި ރީހެބިލިޓޭޝަން ޕްރޮގްރާމްތަކާއި، ކައުންސެލިންގ، ދީނީ ނަސޭހަތް އަދި ފަންނުވެރިކަމުގެ ޕްރޮގްރާމްތައް ހިންގަމުންދާ ކަމަށްވެސް އެމަނިކުފާނު ވިދާޅުވިއެވެ.
ސަރުކާރުގެ އަމާޒަކީ ރާއްޖޭގެ ޖަލުތައް އެއްކޮށްލައި، ސެންޓްރަލް، މައި އެއް ޖަލު ތަރައްޤީކޮށް، ޚަރަދު ކުޑަކޮށް، ރިހެބިލިޓޭޝަން ޚިދުމަތްތަކާއެކު ޖަލުތައް ހިންގުން ކަމަށް ކޮމިޝަނަރ ޒަރީރު ވިދާޅުވިއެވެ.
