ކ. ހިންމަފުށީގައި ވެމްކޯގެ ކުނި މެނޭޖްކުރުމުގެ ޚިދުމަތް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިއަދު ރަސްމީކޮށް ފައްޓަވައިދެއްވައިފިއެވެ. މި ރަސްމިއްޔާތުގައި ވެމްކޯގެ އިސްވެރިންނާއި ސަރުކާރުގެ އިސް ބޭފުޅުން ބައިވެރިވެ ވަޑައިގެންނެވިއެވެ.
ވެމްކޯއިން މިހާރު ފޯރުކޮށްދޭ މި ޚިދުމަތުގެ ދަށުން ހިންމަފުށީގެ ގޭބިސީތަކަށާއި، ކޮންސްޓްރަކްޝަން ސައިޓްތަކަށާއި، ވިޔަފާރިތަކަށް ކުނި މެނޭޖްކުރުމުގެ ޚިދުމަތް ލިބިގެންދާނެއެވެ. މީގެ ކުރިން މި ޚިދުމަތް ވެމްކޯއިން ވަނީ މާލެ އާއި އެހެން އަތޮޅުތަކުގައިވެސް ފޯރުކޮށްދެމުން ގެންގޮސްފައެވެ.
ރައީސުލްޖުމްހޫރިއްޔާ ވިދާޅުވީ ސަރުކާރުން ވަނީ ކުނި މެނޭޖްކުރުމުގެ ޤައުމީ ޕްލޭނެއް ތަޢާރަފުކޮށްފައި ކަމަށެވެ. އަދި މި ޕްލޭނުގެ ދަށުން ރާއްޖޭގެ ހުރިހާ ސަރަޙައްދެއްގައި ކުނި މެނޭޖްކުރުމުގެ ޚިދުމަތް ފޯރުކޮށްދިނުމަށް މަސައްކަތްކުރަމުންދާ ކަމަށް ވިދާޅުވިއެވެ.
މި ޚިދުމަތް ފެށުމާއެކު ހިންމަފުށީގެ ރައްޔިތުންނަށް ކުނި ނައްތާލުމުގެ ފަސޭހަ އަދި ރައްކާތެރި ގޮތެއް ލިބިގެންދާނެ ކަމަށް ބެލެވެއެވެ. އަދި މިކަމުގެ ސަބަބުން ރަށުގެ ތިމާވެށި ރައްކާތެރިކޮށް ބެލެހެއްޓުމަށް އިތުރު ބާރެއް ލިބިގެންދާނެ ކަމަށް އުއްމީދު ކުރެވެއެވެ.
ވެމްކޯގެ ކުނި މެނޭޖްކުރުމުގެ ޚިދުމަތް ހިންމަފުށީގައި ފަށައިފި
