އާދަމްގެފާނަށް ސުވަރުގެ ދޫކުރައްވަވައި ބިމަށް ފައިބާ ވަޑައިގަންނަވަން ޖެހިވަޑައިގަތީ ކުރެއްވެވުނު ހަމަ އެންމެ ފާފައަކާއި ގުޅިގެންނެވެ. ﷲ ތަޢާލާ ނަހީކުރެއްވެވި އެންމެ އަމަލެއް ކުރެއްވެވިގެންނެވެ. އެގަހަކާއި ކައިރިވެވަޑައި ނުގަތުމަށް އަމުރުފުޅުކުރެއްވެވި އެންމެގަހަކުން ފަރިއްކުޅުއްވެވުމުންނެވެ.
ސުވާލަކީ އާދަމްގެފާނަށް އެފަދަ ބޮޑު ކުށެއް އެހައި ފަސާހައިން ކުރެއްވެވުނީ ކީއްވެގެން ހެއްޔެވެ؟ ބައެއް ޢިލްމުވެރިން ބަޔާންކުރައްވަވާގޮތުގައި އެކަމުގައި މެދުވެރިވި ސަބަބަކީ ﷲ ތަޢާލާގެ ނަންފުޅު ބޭނުންކޮށްގެން އެއްވެސް މީހަކު އެއްވެސް މިނަވަރެއްގެ ދޮގެއް ބުނެފާނެ ކަމަށް އާދަމްގެފާނަށް އެއްވެސް ވަރަކަށް ޤަބޫލުފުޅު ކުރެއްވެވިފައިނެތުމެވެ. އެފަދަ ނުބައި އަމަލެއް އެއްވެސް މީހަކު ކޮށްފާނެ ކަމަށް ހިތްޕުޅަށްވެސް ނާރާކަމެވެ.
ފުރަތަމަ ކަމަކީ ދޮގުހެދުމަކީ ބޮޑުފާފައެކެވެ. ﷲ ތަޢާލާ ޙަރާމްކުރައްވަވާފައިވާ ކަމެކެވެ. މިއަދު ދޮގުހަދައި އެދޮގަކީ ތެދުކަން ދެއްކުމުގެ ގޮތުން ﷲ ތަޢާލާ ގަންދީ އެބަ ހުވާވެސް ކުރެއެވެ. މިކުރެވެނީ ކިހައި ބޮޑު ފާފައެއްކަމާއިމެދު ވިސްނައިވެސް ނުލައެވެ. ބިރެއްވެސް ނުގަނެއެވެ. ހުވާކޮށްފައި ދޮގުހެކިދޭ މީހުންވެސް އެކަންކުރަނީ އެއްވެސް ޖެހިލުމެއް ނެތިއެވެ.
ނިކަން ވިސްނައިލަބަލާށެވެ! މީސްތަކުން މިއަދު ވާހަކަދައްކާއިރު ބުނާކޮންމެ ބަހެއްގެ ކުރިއަށް ﷲ ތަޢާލާގެ ނަންފުޅު އެބަ ބޭނުންކުރެއެވެ! ﷲ ގަންދީ ކަމަށްބުނެ ބޮޑެތި ދޮގުތައް ހަދަން އެއްވެސް ބިރެއް ނުގަނެއެވެ. ޖެހިލުމެއްވެސް ނުވެއެވެ. ހީވަނީ ދުލުންބުނެލާ އެންމެ އާދައިގެ ބަހެއް ބުނެލާހެންނެވެ.
މީސްތަކުންނޭވެ! ﷲ ތަޢާލާގެ ނަންފުޅުތަކަކީ އެންމެ މަތިވެރި ނަންފުޅުތަކެވެ. އޮނަސައްތަ އިސްމްފުޅުގައިވާ 99 ނަންފުޅުގެ ތެރެއިންވެސް ﷲ އަށްވުރެ މަތިވެރި އެއްވެސް ނަންފުޅެއް ނުވެއެވެ. އެފަދަ މަތިވެރިކަންބޮޑު ނަންފުޅެއް ބޭނުންކޮށްގެން ދޮގުބަސްތައް ނުބުނާށެވެ! ދޮގުހުވާތައް ނުކުރާށެވެ! ﷲ ތަޢާލާ އިބިލީހަށް ލަޢްނަތް ލެއްވެވިފަދައިން ހަމަ ތިމާއަށްވެސް ލަޢްނަތް ލައްވަވައިފާނެ ކަމަށް ބިރުވެތިވާށެވެ!
ﷲ ތަޢާލާގެ ނަންފުޅު ބޭނުންކޮށްގެން ދޮގުހުވާކުރާއިއރު ވިސްނައިލާށެވެ! ތިބާހަދާ ބޮޑު ދޮގު ﷲ ތަޢާލާ ހަމަ އެންމެ މޮޅަށް ދެނެވޮޑިގެންވެއެވެ. ތިބާއަށް ބޮޑުވެގެންވާ ކޯފާއެއް ލައްވަވައިފާނެކަމަށް ބިރުވެތިވާށެވެ! ތިބާ އެދޭ އެއްވެސް ކަމެއް ޙާޞިލުނުވެ ދުނިޔޭގެ ޙަޔާތްވޭތިކުރަންޖެހި އަދި އާޚިރަތުގައިވެސް އެފަދަ ގޮތެއް މެދުވެރިވެދާނެކަމަށް ބިރުވެތިވާށެވެ!
- ޝައިޚް އަބޫބަކުރު ޒައުދުގެ ދަރުސަކުން
