ކުރީގެ މެންބަރު ޢަލީ ޙަމީދުގެ މަޞްލަޙަތު އޮންނަ ކުންފުންޏަކަށް ދައުލަތުން 44 މިލިއަން ރުފިޔާ ދިން މައްސަލައިގެ ތަޙުޤީޤު އަވަސްކުރުމަށް ޕްރޮސެކިއުޓަރ ޖެނެރަލް އޮފީހުން ފުލުހުންނަށް އަންގަވައިފިއެވެ. މި މައްސަލައަކީ މަޖިލީހުގެ މާލިއްޔަތު ކޮމިޓީން ކަމާބެހޭ އިދާރާތަކަށް ހުށަހެޅި މައްސަލައެކެވެ.
މައްސަލައިގެ ތަފްސީލަށް ބަލާއިރު، ޢަލީ ޙަމީދުގެ މަޞްލަޙަތު އޮންނަ ކުންފުންޏެއް ކަމަށްވާ ނޯތު ކޯސްޓް ކޮންސްޓްރަކްޝަން ޕްރައިވެޓް ލިމިޓެޑަށް ހަވާލުކޮށްފައިވާ ޕްރޮޖެކްޓަކާ ގުޅިގެން، 2023 ވަނަ އަހަރު ދައުލަތުން 44 މިލިއަން ރުފިޔާ ދޫކޮށްފައިވީނަމަވެސް، މިހާތަނަށް އެ މަސައްކަތް ކުރިއަށް ގެންގޮސްފައިނުވާކަމަށް މަޖިލީހުގެ މާލިއްޔަތު ކޮމިޓީން ވިދާޅުވެފައިވެއެވެ.
ޕްރޮސެކިއުޓަރ ޖެނެރަލް އޮފީހުން މި މައްސަލައާ ގުޅިގެން ފުލުހުންނަށް އަންގާފައިވާ ގޮތުގައި، މިއީ ދައުލަތާއި ރައްޔިތުންގެ މަޞްލަޙަތު އޮތް ޙައްސާސް މައްސަލައެއް ކަމަށް ބުނެ، ޚާއްޞަ ތަޙުޤީޤު ޓީމެއް އެކުލަވާލުމަށާއި، އަވަސް މައްސަލައެއްގެ ގޮތުގައި ބެލުމަށް އަންގާފައިވެއެވެ. އަދި މީގެ އިތުރުން، މިފަދަ އިތުރު ޕްރޮޖެކްޓުތައް ވެސް ތަޙުޤީޤުކުރުމަށް އެދިފައިވާކަން ފާހަގަކުރެވެއެވެ.
ޢަލީ ޙަމީދަކީ ޖުމްހޫރީ ޕާޓީގެ ޓިކެޓްގައި މަޖިލީހަށް ހޮވުމަށްފަހު ދިވެހި ރައްޔިތުންގެ ޑިމޮކްރެޓިކް ޕާޓީ (އެމްޑީޕީ) އަށް ބަދަލުވި މެންބަރެކެވެ.
ކުރީގެ މެންބަރު ޢަލީ ޙަމީދުގެ ކުންފުންޏަށް ދައުލަތުން 44 މިލިއަން ރުފިޔާ ދިން މައްސަލަ އަވަސްކުރުމަށް ފުލުހުންނަށް އަންގައިފި
