ވައިގެމަގުން ރާއްޖެ އެތެރެކުރަން އުޅުނު 2.4 ކިލޯގެ މަސްތުވާތަކެތި މޯލްޑިވްސް ކަސްޓަމްސް ސަރވިސްއިން އިއްޔެ އަތުލައިގަތްކަމަށް އެ އިދާރާއިން މިއަދު ހާމަކޮށްފިއެވެ.
ކަސްޓަމްސްގެ ބަޔާނެއްގައި ބުނެފައިވާ ގޮތުގައި، 26 ޑިސެމްބަރ 2024 ވަނަ ދުވަހު ތައިލޭންޑުން ރާއްޖެ އައި ދެ ދިވެހި ފިރިހެނުންގެ އަތުން މި މަސްތުވާތަކެތި ފެނުނެވެ. މި ދެ މީހުންނަކީ 41 އަހަރާއި 21 އަހަރުގެ ދެ ފަސިންޖަރުންނެވެ.
ކަސްޓަމްސްގެ އޮފިޝަލުން މި ދެ ފަސިންޖަރުންގެ ޢަމަލުތަކާމެދު ޝައްކުކުރެވުމާ ގުޅިގެން އިތުރަށް ބަލައި ފާސްކުރުމުން، އެ މީހުންގެ ހަށިގަނޑުގައި މަސްތުވާތަކެތި ފޮރުވާފައި ހުރިކަން ފާހަގަކުރެވުނެވެ.
ފުރަތަމަ މަރުޙަލާގައި ކުރެވުނު ތަޙުލީލުތަކުން ދައްކާގޮތުގައި، މި މަސްތުވާތަކެތީގެ ތެރޭގައި ހިމެނެނީ 0.32 ކިލޯގެ ހެރޮއިނާއި 2.1 ކިލޯގެ މެފެޑްރޯނެވެ. ޕެކިންގއާއެކު މި ތަކެތީގެ ޖުމްލަ ބަރުދަނަކީ 2.4 ކިލޯއެވެ.
ކަސްޓަމްސްއިން ލަފާކުރާ ގޮތުގައި މި މަސްތުވާތަކެތީގެ މަގުމަތީ އަގަކީ ގާތްގަނޑަކަށް 5.5 މިލިއަން ދިވެހި ރުފިޔާއެވެ.
މި މައްސަލަ އިތުރަށް ތަޙުޤީޤުކުރުމަށްޓަކައި، އަތުލެވުނު މަސްތުވާތަކެއްޗާއި ހައްޔަރުކުރެވުނު ދެ ފަސިންޖަރުން މިހާރު ވަނީ ދިވެހި ފުލުހުންގެ ޚިދުމަތާ ޙަވާލުކުރެވިފައެވެ.
ވައިގެމަގުން ރާއްޖެ އެތެރެކުރަން އުޅުނު 2.4 ކިލޯގެ މަސްތުވާތަކެތި ކަސްޓަމްސްއިން އަތުލައިގަނެފި
