17 ނޮވެމްބަރ 2023 އިން ފެށިގެން މިހާތަނަށް އޮޑިވެރިންނަށް 981 މިލިޔަން ރުފިޔާ ދޫކޮށްފައިވާކަމަށް މިފްކޯއިން ހާމަކޮށްފިއެވެ.
މިފްކޯ އިން ބުނެފައިވަނީ މިހާރު އޮޑިވެރިންނަށް ފައިސާ ދޫކުރަމުން ގެންދަނީ 48 ގަޑިއިރުގެ ތެރޭގައެވެ. މީގެ އިތުރުން، ސަރުކާރު ހަވާލުވިއިރު 230 މިލިޔަނަށްވުރެ ގިނަ ރުފިޔާގެ ބެކްލޮގް އޮތްނަމަވެސް، މިހާރު އެ ބެކްލޮގް ވަނީ ފިލުވާލާފައެވެ. މިއީ މި ސަރުކާރުން މަސްވެރިކަމުގެ ދާއިރާއަށް ދެމުންގެންދާ އަހައްމިއްޔަތުކަމުގެ ހެއްކެކެވެ.
17 ނޮވެމްބަރ 2023 އިން 28 ޑިސެމްބަރ 2024 އާ ދެމެދު، ޖުމްލަ 55,925 މެޓްރިކް ޓަނުގެ މަސް ކިރުވާފައިވާކަމަށް މިފްކޯއިން ހާމަކޮށްފައިވެއެވެ. މި މަސައްކަތުގައި ބޭންކް އޮފް މޯލްޑިވްސް، މާލީ އަދި މަސްވެރިކަމުގެ ވުޒާރާތަކުގެ އެހީތެރިކަން ލިބެމުންދާކަން ވެސް ފާހަގަކޮށްފައިވެއެވެ.
މިފްކޯގެ އިސްވެރިއެއް ވިދާޅުވި ގޮތުގައި، "ސަރުކާރުން މަސްވެރިކަމުގެ ސިނާއަތް ކުރިއެރުވުމަށް ގިނަގުނަ މަސައްކަތްތަކެއް ކުރަމުން ގެންދެއެވެ. މި ގޮތުން އޮޑިވެރިންނަށް ފައިސާ އަވަހަށް ދޫކުރުމަކީ އެއް މުހިންމު ފިޔަވަޅެވެ."
މި ފިޔަވަޅުތަކުގެ ސަބަބުން މަސްވެރިކަމުގެ ދާއިރާއަށް އިތުރު ކުރިއެރުންތަކެއް ލިބި، ގައުމުގެ އިގްތިސާދަށް ފައިދާކުރާނެ ކަމަށް އުއްމީދު ކުރެވެއެވެ.
