މުސްލިމުންނަށް އޮތީ ކޮަންމެ ކަމެއް ކުރިމަތިވިނަމަވެސް ސަބަބުތަކުގައި ހިފަހައްޓައިގެން ތިބެ އެކަމަކުން ސަލާމަތްވާން މަސައްކަތްކުރުމެވެ. ސަބަބުތައް ކަމަށް މިބުނަނީ ޢަމަލުކުރަން ﷲ ތަޢާލާ ހުއްދަކުރެއްވެވި ކަންކަމެވެ. ހުއްދަ ކުރައްވަވާފައި ގޮތަށް އެކަންކަން ކުރުމެވެ.
ބަލިވުމުން ބޭސްފަރުވާކުރާއިރު ސަމާލުކަންދޭންޖެހޭނެ 4 ކަމެއް ވެއެވެ.
1 ޑޮކްޓަރަށް ނުވަތަ ޙަކީމެއްގެ ގާތުން ލަފާހޯދައިގެން ފަރުވާކުރުން
2 ބޭސްކުރާ ޑޮކްޓަރަށް ނުވަތަ ޙަކީމަށް ބަލި ދެނެގަތުމުގެ ކުޅަދާނަކަމާއި ތިމާއަށް ޝިފާ ލިބޭނެ ބޭސް ދޭން އަންގަވައިދެއްވެވުން އެދި ދުޢާކުރުން
3 ޝިފާ ދެއްވެވުން އެދި ދުޢާކުރުން
4 ރުޤްޔާކުރަންޖެހޭ ކަންކަމުގަ ރުޤްޔާކުރުން
ދެން އޮތީ ކޮށްގެން ނުވާނެ ކަންތަކެވެ.
1 އެއްވެސް ކަހީނެއް ނުވަތަ ފަންޑިތަވެރިއެއްގެ އެހީ ނުހޯދުން
2 ޝިފާލިބުން ލަސްވެގެން ޝަކުވާނުކުރުން
ދެން އޮތީ އެކަމެއްގައި ދެމިހުންނަން ޖެހޭނެ ކަންތަކެވެ.
އެއީ ވީހައިގިނައިން އަޅުކަންކުރުމެވެ. ބަލިވެ އެނދުގައި އޮންނައިރުވެސް ވަޤުތު ހޭދަކުރަންވީ ފަރުޟު ނަމާދުތައް ކުރުމާއިއެކު ވީހައިގިނައިން ޛިކުރުކުރުމަށެވެ. ވީހައި ގިނައިން ﷲ ތަޢާލާގެމަތިން ހަނދުމަކުރުމަށެވެ.
ވީމާ ބޭކާރު ކަންކަމަށް ވިސްނުމަށާއި ބޭކާރު ވާހަކަތައް ދެއްކުމަށް ވަޤުތު ހޭދަކުރުމުގެ ބަދަލުގައި މިބުނި މަގުން ވަޤުތު ހޭދަކުރާށެވެ. މިބަޔާންކުރި ކަންކަމަށް ސަމާލުކަންދީގެން މަސައްކަތްކުރާނަމަ އެމީހަކަށް ހެޔޮރަޙްމަތް ލައްވަވާނެތެވެ. ޝިފާ ދެއްވަވާނެތެވެ. އިން ޝާ ﷲ ނިންމާލަމުން އެންމެ ފަހު ކަމަކަށްވެސް ބުނެލަން ބޭނުމީ ﷲ ތަޢާލާ ނޫން ފަރާތަކުން ވާގިނުއެދޭށެވެ. ހުރިހާ ކަމެއް ﷲ ތަޢާލާއަށް ވަކީލްކުރާށެވެ.
- މުފްތީ މެންކުގެ ދަރުސަކުން
