ހަންގޭރީގައި ކިޔެވުމަށް 25 ސްކޮލަރޝިޕެއް މަތީ ތަޢުލީމާއި މަސައްކަތްތެރިކަމާއި ހުނަރުތައް ތަރައްޤީކުރުމާބެހޭ ވުޒާރާއިން ހުޅުވާލައިފިއެވެ. މިއީ ހަންގޭރީ ސަރުކާރުގެ ޕްރޮގްރާމެއްގެ ދަށުން ދިވެހި ދަރިވަރުންނަށް ލިބޭ ފުރުޞަތެކެވެ.
މި ސްކޮލަރޝިޕްގެ ދަށުން ބެޗްލަރސް ޑިގްރީއަށް 8 ފުރުޞަތު، މާސްޓަރސް ޑިގްރީއަށް 14 ފުރުޞަތު އަދި ޕީއެޗްޑީއަށް 3 ފުރުޞަތު ލިބޭނެއެވެ. މި ސްކޮލަރޝިޕްގައި ދަރިވަރުންގެ ކޯސް ފީ، ޓިޔުޝަން ފީ، މެޑިކަލް އިންޝުއަރެންސް އަދި ދިރިއުޅުމުގެ ޚަރަދު ހިމެނެއެވެ. އަދި ދެކޮޅު ޓިކެޓާއި ވިސާ ޚަރަދު ހަމަޖައްސައިދޭނީ މަތީ ތަޢުލީމާބެހޭ ވުޒާރާއިންނެވެ.
މި ފުރުޞަތަށް އެދި ހުށަހަޅަން ބޭނުންވާ ފަރާތްތަކުން މައި އެޑިޔު ޕޯޓަލް މެދުވެރިކޮށް އެޕްލިކޭޝަން ހުށަހަޅަންވާނެއެވެ. އެޕްލިކޭޝަން ހުށަހެޅުމުގެ ސުންގަޑިއަކީ 15 ޖެނުއަރީގެ 14:00 އެވެ.
މި ސްކޮލަރޝިޕް ފުރުޞަތަކީ ދިވެހި ދަރިވަރުންނަށް ބޭރު ޤައުމެއްގައި މަތީ ތަޢުލީމު ހާސިލުކުރުމަށް ލިބޭ ރަނުގެ ފުރުޞަތެކެވެ. އަދި މިފަދަ ފުރުޞަތުތަކުން ޤައުމަށް ބޭނުންވާ ދާއިރާތަކުން ތަމްރީނުވެފައިވާ މީހުން އުފެއްދުމަށް މަގުފަހިވެއެވެ.
