ބޭކަލަކު ވަރަށް ގިނައިން ކަރުނަ އަޅުއްވާތީ ސުވާލުކުރުމުން ޖަވާބުގައި އެބޭކަލަކު ވިދާޅުވިއެވެ.
"އަހުރެންނަށް ކުރެވޭ ފާފަތައް ﷲ ވަގުތުން ދެކެވޮޑިގެންވާއިރު އަހުރެންނަށް ކޯފާއެއް ލައްވަވައިފާނެތީއެވެ. ތިބާ ތިހުރީ ތިމަން ﷲ ގެ ރަޙްމަތުން ބޭރުކުރައްވަވާފައިކަމަށް ވަޙީކުރައްވަވައިފާނެތީއެވެ."
ކޮންމެ މީހަކުވެސް އެމީހެއްގެ އަމިއްލަ ނަފްސާއި ކޮށްލަން ޖެހޭ ސުވާލަކީ ތިމާގެ ހިތުގައި މިފަދަ ބިރުވެރިކަން އުފެދޭ ހެއްޔެވެ؟ ކުރެވޭ ފާފަތަކާއިމެދު ދެރަވެ ލޮލުން ކަރުނަ ނުއެޅޭތަނުގައި އެންމެ ކުޑަމިނުން ހިތުގައި ކަންބޮޑުވުން އުފެދޭ ހެއްޔެވެ؟
ހަމަޔަޤީނުންވެސް ﷲ ތަޢާލާ އަންގަވާފައިވާ ގޮތަށް ޢަމަލުތައް ބެހެއްޓޭނީ ﷲ ތަޢާލާއަށް ބިރުވެތިވެވިގެންނެވެ. ބިރުވެތިނުވެވޭނަމަ ފާފަކުރަން ޖެހިލުމެއް ނުވެވޭނެއެވެ.
އެބޭކަލަކު ވިދާޅުވެފައި އެވަނީ ވަރަށް މުހިންމު ބަސްފުޅެކެވެ. ކޮންމެ މުސްލިމަކުވެސް ވިސްނައި ސަމާލުކަން ދޭންޖެހޭނެ ބަސްފުޅެކެވެ. އެހެނީ ނަރަކައިން މިންޖުވެވޭނީ ﷲ ތަޢާލާއަށް ބިރުވެތިވާ ޙާލު ދުނިޔޭގައި އުޅެވުނުނަމައެވެ.
- އިސްލާމީ ތިލަފަތުގެ ދަރުސަކުން
