ބައެއް މީހުންނަށް ބޮޑުވުމުން އެމީހުންނަސް ކުޑައިރު އުޅެވުނު ގޮތް ހަނދާނެއް ނުހުރެއެވެ، މައިންބަފައިންނަށް ކުރެވުނު އުނދަގޫތަކާއި ނުކިޔަމަންތެރިވެ އުޅެވުނުކަން ހަނދާނަކު ނުހުރެއެވެ. ތިމާގެ ސަބަބުން މައިންބަފައިންނަށް ކުރިމަތިވި ކަންކަން ހަނދާނަކު ނުހުރެއެވެ. އެހެންވެ ދަރިން ލިބުމުން ޢަމަލުކުރެވެނީ ވަރަށް ރަޙުމްކުޑަކޮށެވެ. އެއީ ވަރަށް ދެރަކޮށް ކުރެވޭ ކަމެކެވެ.
އަހުރެމެންނަށް ކުސް ކުރެވުނު ފަދައިން އަހުރެމެންގެ ދަރިންނަށްވެސް އަދި އެހެން ކުޑަކުދިންނަށްވެސް ކުށް ކުރެވޭނެއެވެ. އެކުދިންގެ ފުށުން އުނދަގޫވެސް ވާނެއެވެ. އެކުދިންގެ އަތުން އެއްޗެއްސަށްވެސް ގެއްލުން ލިބޭނެއެވެ. އެފަދަ އެއްވެސް ކަމެއް ދިމާވެގެން ރުޅި އައިސް ނުބައި ބަސްތައް ނުބުނާށެވެ. އަތް އިސްނުކުރާށެވެ. އެކުދިންނަށް އޯގާތެރިވެ ރަޙުމްކުރާށެވެ! ކުދިންގެ ކިބައިން އެފަދަ ކަންކަން މެދުވެރިވަނީ އެއީ ކުޑަކުދިންކަމުގައިވާތީއެވެ.
ކަންކަން މެދުވެރިވުމުން ނަޞޭޙަތްދޭށެވެ. އެކަންކުރަންވާނީވެސް ރަޙުމްކުރުން އިސްކުރުމާއިއެކުގައެވެ. ފައިދާކުރާނީ އެއިރުންނެވެ.
ހަމައެފަދައިންވެސް އަނބިމީހާއަށްވެސް ކުށެއް ކުރެވިދާނެއެވެ. ތިބާއަށް ފޯރުކޮށްދޭންޖެހޭ ޚިދުމަތެއް ފޯރުކޮށް ނުދެވިވެސް ހިނގައިދާނެއެވެ. އެފަދަ ކަމެއް ދިމާވާއިރަށް ރުޅިއައިސް ނުބައި ބަސްތައް ނުބުނާށެވެ. އަތް އިސްނުކުރާށެވެ. އޯގާތެރިވެ ރަޙުމްކުރާށެވެ.
އެހެނީ ޙަދީޘްފުޅުގައި އޮތީ ރަޙުމްނުކުރާ މީހަކަށް ރަޙުމް ނުލިބޭނެކަމަށެވެ. ރަޙުމް ލިބެން އޮތީ ﷲ ތަޢާލާ ދެއްވެވުމުންނެވެ. އެއީ ގަދަކަމުން ލިބިގަނެވެން އޮތްކަމެއް ނޫނެވެ. ވީމާ ފުރަތަމަކަމަކަށް ތިމާއަކީ އެހެން މީހުންނަށް ރަޙުމްކުރާމީހަކަށްވާން އެބަޖެހެއެވެ. ރަޙުމް ލިބެން އޮތީ ރަޙުމް ކުރުމުން ކަމުގައިވާތީއެވެ.
ރަޙުމްކުރެވޭނީ ހިތް މަޑުމޮޅިކޮށްގެންނެވެ. ހަރުކަށި ހިތަކަށް އެކަންކުރަން ވަރަށް އުނދަގޫވާނެއެވެ. ވީމާ ތިމާގެ ހިތަކީ މަޑުމޮޅި ހިތަކަށް ހަދަން މަސައްކަތްކުރަން ޖެހޭނެއެވެ. ﷲ ތަޢާލާއީ އަހަރެމެންގެ އެންމެންގެ މައްޗަށް އެންމެ އޯގާތެރިވަންތަ، އެންމެ ބޮޑަށް ރަޙުމް ކުރައްވަވާ ރަޙްމާންވަންތަ ރަޙީމްވަންތަ ރަސްކަލާނގެއެވެ.
ނަމާދުގެ ކޮންމެ ރަކްއަތެއްގައި އެކަމަށް އެބަ އިޢްތިރާފްވަމުއެވެ. ވީމާ ނަމާދުކުރަމުން މީސްތަކުންނަށް، ޚާއްޞަކޮށް އަނބިދަރިންނަށް، އަހުލުވެރިންނަށް ރަޙުމްނުކުރާނަމަ ބަހާއި ޢަމަލު ދިމާކުރެވޭނީވެސް ކިހިނަކުން ހެއްޔެވެ؟
އަދިވެސް ކީއްހެއްޔެވެ؟ ﷲ ތަޢާލާ ބައްލަވައި ވޮޑިގެންވަނީ ހަމައެކަނި އެމީހާ ދުލުން ބުނާ ބަސްތަކަކަށް ނޫނެވެ. ހިތަށާއި ޢަމަލުތަކަށްވެސް ބައްލަވައި ވޮޑިގެންވެއެވެ.
- އިސްލާމީ ތިލަފަތުގެ ދަރުސަކުން
