ތިމާ އެމީހަކާއި ވަކިނުވެ އަބަދު އެކުގައި ހުންނަން ބޭނުންވާ މީހާ (ބައިވެރިޔާ) ތިމާ ދޫކޮށްލައެވެ. އެންމެ ގާތް އެކުވެރިންވެސް ތިމާ ދޫކޮށްލައެވެ. ޢާއިލާގެ މީހުންވެސް ތިމާ ދޫކޮށްލައެވެ. ހުރިހާ ގޮތަކުން އެކަނިވެރިވާންޖެހެއެވެ.
އެކަމަކު ބުނަން ހެއްޔެވެ؟ އެއްގޮތަކަށްވެސް ދެރަވެ މާޔޫސް ނުވާށެވެ! ﷲ ތަޢާލާ ތިބާއަށް އެދެއްވެވީ ވަރަށް ވަރުގަދަ މެސެޖެކެވެ. އެދެއްވެވީ ވަރަށް ބޮޑު ފުރުޞަތެކެވެ.
އެދެއްވެވި މެސެޖަކީ ތިމަން ﷲ ނޫން އެހެން އެންމެން ތިމާ ދޫކޮށް އެކަނިވެރިކޮށްލާނެ ކަމުގެ މެސެޖެވެ. އެދެއްވެވި ފުރުޞަތަކީ ﷲ ތަޢާލާ އާއި އިތުރަށް ކުއްތަންވެ، ބާއްވަންޖެހޭ ގުޅުން ބަދަހިކުރުމުގެ ފުރުޞަތެވެ.
މިމެސެޖަށް ވިސްނައި ސަމާލުކަންދީ އަދި މިފުރުޞަތުގެ ބޭނުން ހިފައިފިނަމަ އެމީހަކަށް ލައްވަވާނެ ރަޙްމަތުގެ ބޮޑުކަން ވަޒަންކުރަންވެސް ނުއެނގޭނެއެވެ. ދުނިޔޭގައިވެސް އަދި އާޚިރަތުގައިވެސްމެއެވެ.
ވީމާ އެންމެން ތިމާ ދޫކޮށްލިޔަސް ދެރަވެ ކަންބޮޑުނުވާށެވެ! ﷲ ތަޢާލާ ތިބާ ދޫކޮށެއް ނުލައްވަވާނެތެވެ. އިން ޝާ ﷲ. އެހެންވެ އަހުރެމެން ކުރަން އޮތްކަމަކީ ކިތަންމެ ގިނަ އެކުވެރިންނާއިއެކު އުޅުނަސް، ބައިވެރިޔާއާއި ޢާއިލާގެ އެންމެންގެ ލޯބި ލިބިގެން އުޅުނަސް ތިމާ އާއި ﷲ ތަޢާލާ އާއި ދެމެދުގައި ބާއްވަންޖެހޭނެ ގުޅުން ފުރިހަމައަށް ބާއްވައިގެން އުޅުމެވެ. އަބަދުވެސް ކިޔަމަންތެރިކަން އަދާކުރުންމަތީގައި ދެމިހުރުމެވެ.
- މުފްތީ މެންކުގެ ދަރުސަކުން
