މަގޭ ސޯލާ ޕްރޮގްރާމުގެ ދަށުން ގޭބިސީތަކުގައި ސޯލާ ސިސްޓަމް ހަރުކުރަން މިމަހު ފަށާނެކަމަށް މޫސުމީ ބަދަލުތަކާއި ތިމާވެއްޓާ ހަކަތައާބެހޭ ވަޒީރު ޠާރިޤް އިބްރާހީމް ވިދާޅުވެއްޖެއެވެ.
ދައުލަތުގެ މީޑިއާއަށް މަޢުލޫމާތު ދެއްވަމުން ވަޒީރު ވިދާޅުވީ މި ޕްރޮގްރާމުގެ ދަށުން 748 ގޭބިސީގައި ސޯލާ ނިޒާމު ހަރުކުރުމަށް ނިންމާފައިވާ ކަމަށެވެ.
ވަޒީރު ޠާރިޤް އިތުރަށް ވިދާޅުވީ މި ޕްރޮގްރާމުގެ ދަށުން 3 ކިލޯވޯޓުގެ ސިސްޓަމެއް 45,000 ރުފިޔާއަށް އަދި 5 ކިލޯވޯޓުގެ ސިސްޓަމެއް 75,000 ރުފިޔާއަށް ލިބޭނެ ކަމަށެވެ. އަދި މި ސިސްޓަމްތަކަށް ފައިސާ ދެއްކޭނީ އެއްފަހަރާ ނުވަތަ 5 އަހަރަށް ބަހާލައިގެން ކަމަށްވެސް އެމަނިކުފާނު ވިދާޅުވިއެވެ.
މި ޕްރޮގްރާމުގެ މައިގަނޑު މަޤްޞަދަކީ ކަރަންޓު ޚަރަދު ކުޑަކުރުމާއި އިއާދަކުރަނިވި ހަކަތަ ބޭނުންކުރުން އިތުރުކުރުން ކަމަށް ވަޒީރު ޠާރިޤް ފާހަގަކުރެއްވިއެވެ. މީގެ އިތުރުން، ރާއްޖޭގައި ބޭނުންކުރާ ކަރަންޓުގެ 33 އިންސައްތަ އިއާދަކުރަނިވި ހަކަތައިން އުފެއްދުމަށް ސަރުކާރުން އަމާޒު ހިފާފައިވާ ކަމަށްވެސް އެމަނިކުފާނު ވިދާޅުވިއެވެ.
މި ޕްރޮގްރާމަކީ ރާއްޖޭގެ ހަކަތައިގެ ދާއިރާގައި އެޅޭ މުހިންމު ފިޔަވަޅެއް ކަމަށާއި، މިއީ ތިމާވެށި ރައްކާތެރިކުރުމަށާއި ދެމެހެއްޓެނިވި ތަރައްޤީއަށް އެޅޭ މުހިންމު ފިޔަވަޅެއް ކަމަށް ވަޒީރު ޠާރިޤް އިބްރާހީމް ވިދާޅުވިއެވެ.
