ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިއަދު ރ. އަނގޮޅިތީމަށް ވަޑައިގެންފިއެވެ. މިއީ ރ. އަތޮޅުގެ 11 ރަށަށް ކުރައްވާ ދަތުރުފުޅުގެ ތެރެއިން އެއް ރަށަށް ކުރައްވާ ޒިޔާރަތެކެވެ.
މި ދަތުރުފުޅުގައި ރައީސް މުޢިއްޒު އަނގޮޅިތީމުގެ އިސްވެރިންނާއި ރައްޔިތުންނާ ބައްދަލުކުރައްވާނެ ކަމަށް ރައީސް އޮފީހުން މަޢުލޫމާތު ދެއްވާފައިވެއެވެ. މީގެ އިތުރުން، ރަށުގެ ތަރައްޤީއަށް މުހިންމު މަޝްރޫޢެއްގެ ގޮތުގައި ބޭންކް އޮފް މޯލްޑިވްސްގެ އޭޓީއެމްއެއް ބެހެއްޓުމުގެ މަސައްކަތް ކައުންސިލާ ހަވާލުކުރެއްވުމަށްވެސް ހަމަޖެހިފައިވާ ކަމަށް އެ އޮފީހުން ބުނެއެވެ.
އަނގޮޅިތީމަށް ފަހު ރައީސް ވަޑައިގަންނަވާނީ ރ. އުނގޫފާރަށެވެ. ރައީސް މުޢިއްޒުގެ އަމާޒަކީ އެމަނިކުފާނުގެ ރިޔާސީ ދައުރުގެ ތެރޭގައި ރާއްޖޭގެ ކޮންމެ ރަށަކަށް މަދުވެގެން ދެފަހަރު ޒިޔާރަތްކުރެއްވުން ކަމަށް ރައީސް އޮފީހުން ހާމަކޮށްފައިވެއެވެ.
މި ދަތުރުފުޅުތަކުގެ މައިގަނޑު މަޤްޞަދަކީ ރަށްރަށުގެ ރައްޔިތުންނާ ސީދާ ބައްދަލުކޮށް، އެ ރަށްރަށުގެ ތަރައްޤީއާ ގުޅޭ ކަންކަމާއި ރައްޔިތުންގެ ކަންބޮޑުވުންތައް އަޑުއެއްސެވުމެވެ. އަދި ސަރުކާރުގެ ތަރައްޤީގެ މަޝްރޫޢުތަކުގެ މަޢުލޫމާތު ރައްޔިތުންނާ ހިއްސާކުރެއްވުމެވެ.
ރައީސް ޑރ.މުޢިއްޒު އަނގޮޅިތީމަށް ވަޑައިގެންފި
