ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިއަދު ރ. މަޑުއްވަރީ ރައްޔިތުންނާ ބައްދަލުކުރައްވައި، އުފުލަންދޫ މަޑުއްވަރީގެ ބައެއްގެ ގޮތުގައި ހަމަޖައްސާފައިވާ ކަމަށް އިޢުލާނުކުރައްވައިފިއެވެ.
މީގެ އިތުރުން، ރަށުގެ ތަރައްޤީއަށް ގިނަ މަޝްރޫޢުތަކެއް ކުރިއަށް ގެންދިއުމަށް ނިންމާފައިވާ ކަމަށްވެސް ރައީސް ވިދާޅުވިއެވެ.
ރައްޔިތުންނާ ބައްދަލުކުރެއްވުމުގައި ރައީސް މުޢިއްޒު ވިދާޅުވީ، މަޑުއްވަރީގެ ބިމުގެ ދަތިކަން ޙައްލުކުރުމަށްޓަކައި 6 ހެކްޓަރުގެ ބިން ހިއްކުމަށް ނިންމާފައިވާ ކަމަށެވެ. އަދި ރަށުގެ ބަނދަރާއި ގިރާ ސަރަހައްދު ހިމާޔަތްކުރުމުގެ މަސައްކަތްވެސް ކުރިއަށް ގެންދާނެ ކަމަށް ވިދާޅުވިއެވެ.
ރަށުގެ ބޯހިޔާވަހިކަމުގެ ދަތިކަން ޙައްލުކުރުމަށްޓަކައި 50 ހައުސިންގ ޔުނިޓް އެޅުމަށް ނިންމާފައިވާ ކަމަށްވެސް ރައީސް ހާމަކުރެއްވިއެވެ. މީގެ އިތުރުން، ރަށުގެ މަގުތައް ހެދުމާއި ސިއްޙީ މަރުކަޒު ތަރައްޤީކުރުމުގެ މަސައްކަތްވެސް ކުރިއަށް ގެންދާނެ ކަމަށް ވިދާޅުވިއެވެ.
ޒުވާނުންނަށް އަމާޒުކޮށް، ރަށުގައި ފުޓުބޯޅަ ދަނޑެއް ތަރައްޤީކުރުމަށްވެސް ނިންމާފައިވާ ކަމަށް ރައީސް މުޢިއްޒު ވިދާޅުވިއެވެ. މި ހުރިހާ މަޝްރޫޢުތަކެއްގެ ސަބަބުން ރަށުގެ ބިމުގެ ދަތިކަމާއި އެހެނިހެން މައްސަލަތަކަށް ޙައްލު ލިބޭނެ ކަމަށް ރައީސް ޔަޤީންކަން ދެއްވިއެވެ.
މި ބައްދަލުވުމުގައި ރަށު ރައްޔިތުން ވަރަށް ބޮޑަށް އުފާކުރި ކަމަށާއި، މި ތަރައްޤީގެ މަޝްރޫޢުތަކުގެ ސަބަބުން ރަށުގެ ދިރިއުޅުމުގެ ފެންވަރު މަތިވެ، އިޤްތިޞާދީ ގޮތުން ކުރިއެރުން ލިބޭނެ ކަމަށް އުންމީދުކުރާ ކަމަށް ބައެއް ރައްޔިތުން ފާޅުކުރިއެވެ.
