މިއަހަރު ރާއްޖޭގެ ޙައްޖުވެރިންގެ އިސް ޝައިޚަކަށް ވަޑައިގަންނަވާނީ އިސްލާމީ ކަންތައްތަކާ ބެހޭ ވުޒާރާގެ ވަޒީރުގެ ނާއިބު ފަޟީލަތުއްޝައިޚު މުޠީޢު އިސްމާޢީލް ކަމަށް އިސްލާމިކް މިނިސްޓްރީން ބުނެފިއެވެ.
މިކަން ހާމަކުރައްވަމުން އިސްލާމީ ކަންތައްތަކާބެހޭ ވަޒީރު ޑރ. މުޙައްމަދު ޝަހީމް ޢަލީ ސަޢީދު ސޯޝަލް މީޑިއާގައި ޕޯސްޓެއް ކުރައްވާފައިވެއެވެ. ޝައިޚު މުޠީޢު އަކީ ސަޢުދީ ޢަރަބިއްޔާގެ ޤާސިމް ޔުނިވަރސިޓީން އިސްލާމީ ޝަރީޢާއިން ބެޗްލަރސް ޑިގްރީ ހާސިލްކުރައްވާފައިވާ ބޭފުޅެކެވެ.
ޙައްޖުވެރިންގެ އިސް ޝައިޚްގެ މަސްއޫލިއްޔަތުތަކުގެ ތެރޭގައި ޙައްޖުގެ އަޅުކަމާ ގުޅޭ ދަރުސްތައް ޙައްޖުވެރިންނަށް ދިނުމާއި، ދީނީ މަޢުލޫމާތު ފޯރުކޮށްދިނުން ހިމެނެއެވެ. އަދި ޙައްޖު ދުވަހު އަރަފާތު ބިމުގައި ޙައްޖު ޚުޠުބާ ދިވެހި ބަހުން ގެނެސްދިނުމަކީވެސް އިސް ޝައިޚުގެ މަސްއޫލިއްޔަތުތަކުގެ ތެރޭގައި ހިމެނޭ މުހިންމު ކަމެކެވެ.
ފާއިތުވި 1445 ވަނަ އަހަރު ރާއްޖޭގެ ޙައްޖުވެރިންގެ އިސް ޝައިޚެއްގެ ގޮތުގައި ހުންނެވީ ޝައިޚު ޑރ. އާދަމް ޝަމީމެވެ. އަދި މިއަހަރު އެ މަޤާމަށް ޝައިޚު މުޠީޢު އިސްމާޢީލް ހޮވިވަޑައިގަތުމާއެކު، ކުރިއަށް އޮތް ޙައްޖު މޫސުމުގައި ދިވެހި ޙައްޖުވެރިންނަށް އެ މަނިކުފާނުގެ ޚިދުމަތް ލިބިވަޑައިގަންނަވާނެއެވެ.
