މިއަހަރުގެ މިހާތަނަށް ދައުލަތުގެ ޚަރަދުތައް ވަނީ މިދިޔަ އަހަރުގެ މި މުއްދަތާ އަޅާބަލާއިރު 21 އިންސައްތަ ދަށްވެފައެވެ. މާލީ ވުޒާރާއިން އާންމުކޮށްފައިވާ އެންމެ ފަހުގެ ވީކްލީ ފިސްކަލް ރިޕޯޓުގައިވާ ގޮތުން، މި މަހުގެ 13 ވަނަ ދުވަހުގެ ނިޔަލަށް ދައުލަތުގެ ޚަރަދުތައް ހުރީ މިދިޔަ އަހަރުގެ މި މުއްދަތުގައި ހިނގި 4.9 ބިލިއަން ރުފިޔާއަށްވުރެ ދަށް މިންވަރެއްގައެވެ.
ދައުލަތުގެ ޚަރަދުތަކުގެ ތެރޭގައި ހިމެނެނީ ރިކަރަންޓް ޚަރަދުގެ ގޮތުގައި 2.8 ބިލިއަން ރުފިޔާ އާއި ކެޕިޓަލް ޚަރަދުގެ ގޮތުގައި 169 މިލިއަން ރުފިޔާއެވެ. ރިކަރަންޓް ޚަރަދުގެ ތެރޭގައި މުވައްޒަފުންގެ މުސާރައާއި އިނާޔަތްތަކަށް 1.1 ބިލިއަން ރުފިޔާ އަދި އިދާރީ ހިންގުމަށް 1.7 ބިލިއަން ރުފިޔާ ހިމެނެއެވެ. ކެޕިޓަލް ޚަރަދުގެ ބޮޑު ބައެއް ހޭދަކުރެވިފައިވަނީ އުމްރާނީ ތަރައްޤީގެ މަޝްރޫއުތަކަށެވެ.
އަހަރުގެ މިހާތަނަށް ދައުލަތަށް ލިބިފައިވާ އާމްދަނީގެ ޖުމްލައަކީ 4.4 ބިލިއަން ރުފިޔާއެވެ. މީގެ ތެރޭގައި ޓެކްސްގެ ގޮތުގައި ލިބުނު 3.8 ބިލިއަން ރުފިޔާއާއި، ޓެކްސް ނޫން އާމްދަނީގެ ގޮތުގައި ލިބުނު 541 މިލިއަން ރުފިޔާ، އަދި އެހީގެ ގޮތުގައި ލިބުނު 28.3 މިލިއަން ރުފިޔާ ހިމެނެއެވެ.
ޓެކްސް އާމްދަނީގެ ތެރޭގައި މައިގަނޑު ގޮތެއްގައި ހިމެނެނީ އިމްޕޯޓް ޑިއުޓީ، ބިޒްނަސް އެންޑް ޕްރޮޕަޓީ ޓެކްސް (ބީޕީޓީ) އަދި ގުޑްސް އެންޑް ސަރވިސް ޓެކްސް (ޖީއެސްޓީ) ގެ ގޮތުގައި ލިބުނު އާމްދަނީއެވެ.
މާލީ ވުޒާރާގެ ތަފާސް ހިސާބުތަކުން ދައްކާ ގޮތުގައި މި މަހުގެ 13 ވަނަ ދުވަހުގެ ނިޔަލަށް، ދައުލަތުގެ ޚަރަދަށްވުރެ އާމްދަނީ 1.3 މިލިއަން ރުފިޔާ އިތުރުވެފައިވެއެވެ.
