އެއްވެސް މީހަކީ ޝައިޠޯނާގެ ކިބައިން ސަލާމަތްވެ ހުރެވޭނެ މީހެއް ނޫނެވެ. ނަމަވެސް އެމީހަކު އެކަމަށް އެދިގެން މަސައްކަތްކުރާނަމަ ﷲ ތަޢާލާ އެމީހަކަށް ރަޙްމަތް ލައްވަވާނެތެވެ. އިން ޝާ ﷲ
ޝައިޠޯނާގެ ސަބަބުން ނުބައި ޚިޔާލުތައް ކުރެވޭނެއެވެ. ﷲ ތަޢާލާ އާއިމެދުގައިވެސް ނުބައި ވިސްނުންތައް އަންނާނެއެވެ. ނުބައި ޚިޔާލާއި ފިކުރުތައް ކުރެވޭނެއެވެ. އެއީ ހުއްޓުވޭނެ ކަންކަމެއްވެސް ނޫނެވެ.
އެފަދަ ޙާލަތުގައި ކުރަން އޮތް ކަމަކީ އެއީ ޝައިޠޯނާގެ ކިބައިން އަންނަ ކަންކަމަށް ޤަބޫލުކޮށް އެކަންކަމަށް އަޅައިވެސް ނުލުމެވެ. ﷲ ތަޢާލާގެ ދީނުގައި ކުރިއަށްދާން މަސައްކަތްކުރުމެވެ. އެފަދަ ކަންކަން ކުރިމަތިވާނަމަ ދުޢާކުރާށެވެ!
"އިނބަ ﷲ އީ މިއަލާގެ ހުރިހާ ކަންކަމެއް އެންމެ މޮޅަށް ދެނެވޮޑިގެންވާ އިލާހްއެވެ. އިނބަ ﷲ އީ ފާފަ ފުއްސަވައި ދެއްވެވުމުގައި ދީލަތިވަންތކަން ބޮޑު އިލާހްއެވެ! މިއަޅާގެ ފާފަތައް ފުއްސަވައިދެއްވަވާނދޭވެ! ޝައިޠޯނާގެ ވަސްވާސްތަކުން މިއަޅާއަށް ސަލާމަތްކަން ދެއްވަވާނދޭވެ!"
މިފަދަ ޢިބާރާތްތަކުން ކުރާ ދުޢާގައި އޮނަސައްތަ އިސްމްފުޅުގައި ހިމެނޭ ﷲ ތަޢާލާގެ ނަންފުޅުތަކުން ދަންނަވާށެވެ! އެއީ ތިމާގެ ނިކަމެތިކަން ބަޔާންކުރުމަށެވެ. ތިބާގެ ހިތުގައި ﷲ ތަޢާލާއަށް އޮތް ލޯބީގެ ބޮޑުކަން ބަޔާންކުރުމަށެވެ. އެމީހެއްގެ ފާފަތައް ފުއްސަވައިދެއްވަވާނެތެވެ. އަދި ޝައިޠޯނާގެ ކިބައިން ސަލާމަތްކަންވެސް ދެއްވަވާނެތެވެ. އިން ޝާ ﷲ
ހަމަ އެއާއިއެކު ފަރުޟުތައް އަދާކުރަމުން ސުންނަތް އަޅުކަންކުރުން ގިނަކުރާށެވެ! ޤުިރްއާން ކިޔެވުމާއި ޛިކްރުކުރުން ގިނަކުރާށެވެ. އިސާހިތަކު ޝައިޠޯނާ މާޔޫސްވެ ތިބާ އާއި ދުރަށްޖެހެން ފަށައިފާނެއެވެ. އިން ޝާ ﷲ
- މުފްތީ މެންކުގެ ދަރުސަކުން
