މީސްތަކުންނޭވެ! ޢުމުރުން ވީދުވަހަށް ނުބަލާށެވެ! ކުރެވިފައިވާ ފާތަކުގެ ޢަދަށާއި ބޮޑުކުޑަމިނަށްވެސް ނުބަލާށެވެ! މިދޭ ނަޞޭޙަތް އަޑުއަހައި ޢަމަލުކުރަން އަވަސްވެގަންނާށެވެ!
ކުރެވެމުން އަންނަ ފާފަތައް ކުރުން ހުއްޓައިލާށެވެ! އެކަންކުރަންވީ ތިމާއަށް ވިސްނި ﷲ ތަޢަލާގެ މަގަށް އެނބުރި ރުޖޫޢަވުމަށްޓަކައެވެ. ﷲ ތަޢާލާއަށް ބިރުވެތިވާ ހާލުގައެވެ. އަދި ތައުބާވެ އިތުރު ފާފައެއް ނުކޮށް ހުންނަން ގަދައަޅައި މަސައްކަތްކުރަމުން ގެންދާށެވެ. އެއިރުން ތިބާއަށް ކުރިން ކުރެވިފައިވީ ފާފަތައް އެއީ ކުރެވުނު ހެޔޮ ޢަމަލުތަކަކަށް ބަދަލުކޮށް ދެއްވަވަން ﷲ ތަޢާލާ ލޯބިވެވޮޑިގެންވެއެވެ.
ވިސްނާލަންވީ އެއިރުން މީޒާން ތިބާގެ ކޮޅަށް ބުރަވެގެންދާނެ މިންވަރަށެވެ. އެތައް ހާސްގުނައަކަށް ތިބާގެ ކޮޅަށް ބުރަވެގެންދާނެ ކަމާއިމެދުގައެވެ.
މިއީ އެކަމަށް އެންމެ ރަނގަޅުވަޤުތެވެ. އެންމެ ފަހިފުރުޞަތު އޮތް، އެންމެ ފަސޭހަވާނެވެސް ވަޤުތެވެ. އެހެނީ ބަރަކާތްތެރި ރަމަޟާންމަސް ފެށުމާއިއެކު ﷲ ތަޢާލާ ވާނީ ޝައިޠޯނުންތަކުގެ ތެރެއިން ބޮޑެތި މާރިނދުންތައް ކަސްތޮޅު އަޅުއްވަވައިފައެވެ. މިހާރު ވީއްލިފައި ތިބޭނީ ކުދި ޝައިޠޯނުންތަކެވެ. ވީމާ ޝައިޠޯނުންތަކުގެ ނުފޫޒު އެންމެ ކުޑަވާނީ މިވަޤުތުގައެވެ. ވީމާ ކުރެވޭ ފާފަ ކުރުން ހުއްޓާލަން މިވަޤުތަށްވުރެ ފަސޭހަ ވަޤުތެއް ނުވާނެއެވެ.
ﷲ ތަޢާލާ ދެއްވަވާފައިވާ ބުއްދީގެ ބޭނުން ހެޔޮގޮތުގައި ހިފާށެވެ! މީޒާން ތިބާގެ ކޮޅަށް ބުރަކޮށްލައި ސުވަރުގެ ވަދެވޭ މީހުންގެ ތެރެއިންވުމަށް ގަދައަޅައި މަސައްކަތްކުރާށެވެ! އެއަށްވުރެ ފައިޑާހުރި އެއްވެސް ކަމެއް ނެތެވެ.
- މަޢުލޫމާތު: މުފްތީ މެންކުގެ ދަރުސަކުން
