ހުރިހާ މައްސލަތަކަކާ ކަންބޮޑުވުންތަކުން އަރައިގަތުމަށްވެސް ކުރަން އޮތީ ހަމަ އެންމެ ކަމެކެވެ. އެއީ ތިމާގެ ހިތް ﷲ ތަޢާލާއިން ފުރައިލުމެވެ. އެމީހެއްގެ ހިތް ﷲ ތަޢާލާއިން ފުރާލައިފި މީހަކު އަބަދުވެސް ހުންނާނީ އުފަލުގައެވެ.
ދުނިޔެއިން ޙާޞިލްކުރަން ބޭނުންވާ އެއްވެސް ކަމަކަށް ތިމާގެ ހިތް ހުސްކޮށްނުލާށެވެ! އަދި ދުނިޔެއިން ޙާޞިލުކުރަން ބޭނުންވާ ހުރިހާ ކަމެއްވެސް ﷲ ތަޢާލާގެ ފަހަތަށް ގެންނާށެވެ!
ބަރަކާތްތެރި ރަމަޟާންމަސް އައިސް ބައްދަލުކުރުމުންވެސް އަޅުކަންކުރާނެ ވަޤުތު ނުހޯދިގެން ތިއައުޅެނީ ދުނިޔޭގެ ބޭނުންތަކަށް އިސްކަންދެވޭތީއެވެ. މިއީ ދުނިޔޭގެ ބޭނުންތައް އެންމެ ބޮޑަށް ފަހަތަށް ޖައްސާލަންވީ ވަޤުތެވެ.
ތިމާގެ ހިތް ﷲ ތަޢާލާއިން ފުރާލަންވީ ﷲ ތަޢާލާއަށްޓަކައެއް ނޫނެވެ. ތިމާއަށްޓަކައެވެ. ދުނިޔެއާއި އާޚިރަތްދުވަހުގެ ނަޞީބުވެރިއަކަށް ތިމާވުމަށެވެ. ތިމާ ނަރަކައިން ސަލާމަތްވެ ސުވަރުގެ ވަނުމަށެވެ.
ޔަޤީންކުރާށެވެ! ތިމާގެ ހިތް ﷲ ތަޢާލާއިން ފުރާލައިފި މީހަކަށް ދުނިޔޭގައިވެސް ކާމިޔާބީ މިންވަރުކުރައްވަވާނެތެވެ! އެމީހަކަށް ކުރިމަތިވާ ކަންކަމުން ސަލާމަތްކޮށްދެއްވަވާނެތެވެ. އުފަލުގައި ދުނިޔޭގައި ހުރުމަށް އެއަށްވުރެ ޔަޤީން ޢަމަލެއް ނެތެވެ.
- އިސްލާމީ ތިލަފަތުގެ ދަރުސަކުން
