ސްޓެލްކޯއިން ބިލު ފޮނުވާ އުސޫލަށް ބަދަލު ގެނެސްފި: ރީޑިން ނަގާތާ އެއް ދުވަސް ފަހުން ބިލު ފޮނުވާގޮތަށް
ސްޓޭޓް އިލެކްޓްރިކް ކޮމްޕެނީ ލިމިޓެޑް (ސްޓެލްކޯ) އިން ކަރަންޓު ބިލު ފޮނުވާ އުސޫލަށް ބޮޑު ބަދަލެއް ގެނެސްފިއެވެ. މިގޮތުން މީގެ ފަހުން ކަރަންޓު ބިލު ފޮނުވާނީ ރީޑިން ނަގާތާ އެންމެ އެއް ދުވަސް ފަހުން ކަމަށް ސްޓެލްކޯގެ މެނޭޖިން ޑިރެކްޓަރ ޙުސައިން ފަހުމީ މިއަދު ހާމަކުރެއްވިއެވެ.
ދައުލަތުގެ މީޑިއާއަށް މަޢުލޫމާތު ދެއްވަމުން ފަހުމީ ވިދާޅުވީ، މި ބަދަލު ގެނެސްފައިވަނީ ރައްޔިތުންނަށް ލުއިފަސޭހަ ގޮތްތަކެއް ހޯދައިދިނުމުގެ މަޤްޞަދުގައި ކަމަށެވެ. މިހާރު ޢަމަލުކުރަމުންދިޔަ އުސޫލުގެ ދަށުން ބިލު ފޮނުވަމުން ދިޔައީ ރީޑިން ނެގުމަށްފަހު 25 ދުވަސް ފަހުންނެވެ. މިކަމުގެ ސަބަބުން ޢާންމުންގެ މެދުގައި ބިލަށް އަރާވަރާ މެދު އޮޅުންތަކެއް އުފެދެމުންދިޔަ ކަމަށް ފަހުމީ ފާހަގަކުރެއްވިއެވެ.
މި އައު ބަދަލާ ގުޅިގެން، ސްޓެލްކޯއިން ވަނީ މިދިޔަ މަހު ދެ ބިލެއް ފޮނުވާފައެވެ. އެއީ މިދިޔަ މަހާއި އޭގެ ކުރީ މަހުގެ ބިލެވެ. އެހެންކަމުން، އަންނަ މަހުން ފެށިގެން ސްޓެލްކޯއިން ފޮނުވަމުންދާނީ އެ މަހެއްގެ ބިލު އެކަންޏެވެ.
ފަހުމީ އިތުރަށް ވިދާޅުވީ، ސްޓެލްކޯއިން އަބަދުވެސް މަސައްކަތް ކުރަމުންދާނީ ރައްޔިތުންނަށް ވީހާވެސް ލުއިވާނެ ގޮތަކަށް ކަމަށެވެ. އަދި ބިލު ތައްޔާރުކުރަނީ މީޓަރުގެ ރީޑިން ވަރަށް ރަނގަޅަށް ޗެކްކުރުމަށްފަހު ކަމަށް ވިދާޅުވިއެވެ. މީގެއިތުރުން، ބިލުގައި އެއްވެސް އޮޅުވާލުމެއް ނުވަތަ އަގު މަތިކުރުމެއް ނޯންނާނެކަމުގެ ޔަޤީންކަން ވެސް ފަހުމީ ދެއްވިއެވެ.
މި ބަދަލަކީ ރައްޔިތުންނަށް ފަސޭހަވެ، ކަރަންޓު ބިލުތަކާ ގުޅޭ ގޮތުން އުފެދިފައިވާ އޮޅުންތައް ފިލުވައިދޭނެ ބަދަލެއް ކަމަށް ބެލެވެއެވެ. އަދި މިކަމުގެ ސަބަބުން ރައްޔިތުންނަށް އެމީހުންގެ ކަރަންޓު ބޭނުންކުރާ މިންވަރު ދެނެގަތުމަށް ފަސޭހަވެގެންދާނެ ކަމަށްވެސް ލަފާކުރެވެއެވެ.
ސްޓެލްކޯއިން ބިލު ފޮނުވާ އުޞޫލަށް ބަދަލު ގެނެސް ރީޑިން ނަގާތާ 1 ދުވަސް ފަހުން ބިލު ފޮނުވާގޮތައް ހަމަޖައްސައިފި
