ބަރަކާތްތެރި ރަމަޟާން މަސް ފެށުމާއިއެކު މިގެންދަނީ އަޅުކަންކުރުމުގައި ރޭސްޖަހަމުންނެވެ! ވީހާ ގިނަ އަޅުކަންކުރަން މަސައްކަތްކުރަމުންނެވެ. ﷲ ތަޢާލާގެ ރުހިވޮޑިގަތުން ހޯދަން ގަދައަޅައި މަސައްކަތްކުރަމުންނެވެ.
ތިބާ ނަމާދުކުރަނީ ﷲ ތަޢާލާ އަންގަވާފައިވާ މިންވަރަށް ނިވާވެ ހުރެގެންނެވެ. ނަމާދު ނިމުމާއިއެކު މީސްތަކުންގެ ކުރިމައްޗަށް ނުކުންނަނީ ﷲ ތަޢާލާ އަންގަވާފައިވާ މިންވަރަށް ނިވާވެ ހުރެގެން ކަމަށްނުވާނަމަ ﷲ ތަޢާލާއަށް އެބަ ކިޔަމަންތެރިވެވޭ ހެއްޔެވެ؟
މީސްތަކުންނޭވެ! ޚާއްޞަކޮށް ލޮބުވެތިކަނބަލުންނޭވެ! (މިހާރު ފުރިހަމއަށް ނިވާނުވާނުވާނަމަ) ލައިއުޅޭ ފޭރާން އަވަހަށް އިޞްލާޙްކޮށްލާށެވެ! ﷲ ތަޢާލާ އަންގަވާފައިވާ މިންގަނޑުން ފޭރާންލާން ފަށާށެވެ!
އަޅުކަމުގެ އެއްމާނައަކީވެސް ކިޔަމަންތެރިކަން އަދާކުރުމެވެ. ވީމާ ފުރިހަމަ ގޮތުގައި ﷲ ތަޢާލާއަށް ކިޔަމަންތެރިވާ އަޅަކަށްވާށެވެ! މިއީ އެކަމަށް ޢަމަލުކުރަން އޮތް އެންމެ ރަނގަޅު ދުވަސްވަރެވެ. މިހެން މިބުނަނީ ކުރިން ބުނިފަދައިން މިދުވަސްތަކަކީ ތިމާގެ ކިޔަމަންތެރިކަން ﷲ ތަޢާލާއަށް ދެއްކެތޯ އެންމެ ބޮޑަށް މަސައްކަތްކުރާ ދުވަސްތަކަށްވާތީއެވެ. ކޮންމެ ދުވަހަކު ރޯދަހިފައި ނަމާދުކުރުމަށް ޚާއްޞަ ސަމާލުކަމެއްދީގެން ނަމާދުކުރަމުން އަންނަ ދުވަސްތައް ކަމަށްވާތީއެވެ.
- އިސްލާމީ ތިލަފަތުގެ ދަރުސަކުން
ތިރީގައިވާ ލިޔުންވެސް ވިދާޅުވެލައްވާށެވެ!
މީހަކު ބުނެފާނެއެވެ. އަހުރެން ހެދުންލައި އުޅޭ ގޮތުގައި އޮތީ ކޮން މައްސަލައެއް ހެއްޔެވެ؟ އެސުވާލު އެގޮތަށް ކުރާ މީހާއަކީ ﷲ ތަޢާލާއަށް އީމާންވެގެން ހުރި މީހަކު ކަމުގައިވާނަމަ އެކަމުގައި ވަރަށް ބޮޑު މައްސަލައެއް އެބައެބައޮތެވެ.
އެއީ ފޭރާންލާން ވަކިގޮތެއް ﷲ ތަޢާލާ އަންގަވާފައިވަނިކޮށް އެއަމުރުފުޅު ދޫކޮށްލައި ދިއުމެވެ. ﷲ ތަޢާލާގެ އަމުރުފުޅަކަށް ޢަމަލުނުކޮށް ހުރެފައި އެކަމުގައި އޮތީ ކޮން މައްސަލައެއްތޯ ސުވާލުކުރުމުގެ ޙައްޤު ލިބިގެންވަނީ ކާކަށް ހެއްޔެވެ؟
"އަދި ﷲ އާއި، އެކަލާނގެ ރަސޫލާ ކަމަކަށް ނިޔާކުރައްވައިފިހިނދު، މުއްމިން ފިރިހެނަކަށްވެސް، އަދި މުއްމިން އަންހެނަަކަށްވެސް، އެއުރެންގެ އެކަމުގައި އެއުރެންނަށް އިޚްތިޔާރު އޮތުމަކީ ނެތްކަމެކެވެ. އަދި ﷲ އަށާއި، އެކަލާނގެ ރަސޫލާއަށް އުރެދިއްޖެ މީހާ (ދަންނާށެވެ!) ފަހެ، ފާޅުވެގެންވާ މަގުފުރެދުމަކުން އެމީހަކު ފުރެދިއްޖެކަން ކަށަވަރެވެ" (އަލް އަޙްޒާބް: 36)
މީސްތަކުންނޭވެ! ﷲ ތަޢާލާ އަންގަވާފައިވާ ގޮތަށް ފޭރާން ނުލުމަކީ އެމީހެއްގެ އިޚްތިޔާރުގައި އޮތްކަމެއް ނޫންކަން ޔަޤީންވަނީ މިއާޔަތުންނެވެ. " ފިރިހެނަކަށްވެސް، އަދި މުއްމިން އަންހެނަަކަށްވެސް، އެއުރެންގެ އެކަމުގައި އެއުރެންނަށް އިޚްތިޔާރު އޮތުމަކީ ނެތްކަމެކެވެ." އޮތް ބަސްފުޅުންނެވެ.
މިހައި ވަރުގަދައަށް، ގަދަފަކޮށް އަންގަވާފައިވާ އެންގެވުންތަކަށް ޢަމަލުނުކޮށް ހުރެ "މައްސަލައަކީ ކޮބައިތޯ؟" ސުވާލުކުރުމަކީ އެކަލާނގެއަށް އީމާންވެގެން ހުރި މީހަކަށް ކުރެވޭނެ ނުވަތަ ކުރެވިގެންވާނެ ކަމެއް ނޫނެވެ.
- މުފްތީ މެންކުގެ ދަރުސަކުން
