ﷲ ތަޢާލާގެ ޙަޟްރަތުން ކަމަކަށް އެދިގެން ދުޢާކުރާ މީހާ ދަންނާށެވެ! ކިތަންމެ ގިނަ ފަހަރު ނުވަތަ ކިތަންމެ ގިނަ ދުވަހެއް ވަންދެން އެއްކަމަކަށް އެދިގެން ދުޢާކުރަން ޖެހުމަކީ ކަންބޮޑުވާންވީ ކަމެއް ނޫނެވެ. ކުރަން އޮތް ހަމަ އެކަނި ހަމައެކަނި ކަމަކީ ތިމާކުރާ ދުޢާ ﷲ ތަޢާލާ އައްސަވައިވޮޑިގެންވާ ކަމާއި ޢިޖާބަކުރައްވަވާނެކަމުގެ ޔަޤީންކަން ހިތުގައި ބާއްވައިގެން ދުޢާކުރުމެވެ.
ދުޢާކުރަންވާނީ ތިމާގެ ހުރި ނިކަމެތިކަމާއި އެކަމަކަށް ބޭނުންވެގެންހުރި މިންވަރު ބަޔާންކުރަމުންނެވެ. ﷲ ތަޢާލާގެ ރުހިވޮޑިގަތުން ލިބޭނެ ގޮތަށް ޢަމަލުތައް ބަހައްޓައިގެން ހުރެއެވެ. ޔަޤީންކުރާށެވެ! ކިތަންމެ ގިނަ ފަހަރު ދުޢާކުރިނަމަވެސް އައްސަވައި ވޮޑިގަތުމަށް ﷲ ތަޢާލާ ފޫހިފުޅުވެވޮޑިގެނެއް ނުވެއެވެ. ދުޢާކުރަން ތިބާ ފޫހިވަންދެން އެކަން އެގޮތަށް ދެމިއޮންނާނެއެވެ. އިން ޝާ ﷲ
ތިމާ އެދިދެންނެވި ކަންތައް ހަމަ އެގޮތަށް ހިންމަވައި ނުދެއްވަވައިފާނެއެވެ. ނަމަވެސް މިބުނި މަގުން ދުޢާކުރުންމަތީގައި ހުރެއްޖެނަމަ އެންމެ އެންމެ ފައިދާބޮޑުވާނެ ގޮތަށް ކަންކަން ހިންމަވައި ދެއްވަވާނެތެވެ. އެއީ އަހުރެމެންނަށް އެންމެ ފައިދާހުރި ގޮތް އަހުރެމެންނަށް ނުއެނގޭތީއެވެ. އެހެނަސް ﷲ ތަޢާލާ ދެނެވޮޑިގެންވާތީއެވެ.
- އިމާމް ޢުމަރު ސުލައިމާންގެ ދަރުސަކުން
