ކޮންމެ ކަމެއްވެސް ޙާޞިލުކުރެވޭނީ އެކަމަށް މަސައްކަތްކުރުމުންނެވެ. މިއީ ދުނިޔެއިންވެސް އަބަދު ފެންނަ ކަމެކެވެ. މަސައްކަތްނުކޮށް އަތް އުރާލައިގެން ތިބޭ މީހުންނަށް ޖެހެނީ އަބަދުވެސް ފޭލްވެގެން ތިބޭށެވެ!
ފާފަ ކުރެވޭނަމަ އެކަން ހުއްޓާލަންވެސް މަސައްކަތްކުރާށެވެ! އެކަމަށް މަގުދައްކަވާނެތެވެ. އެކަން މިއޮތީ ޤުްރްއާނުން އެނގޭށެވެ!
ﷲ ތަޢާލާގެ ވަޙީބަސްފުޅުގައި ވަނީ މިފަދައިންނެވެ.
﴿يَهْدِي بِهِ اللَّهُ مَنِ اتَّبَعَ رِضْوَانَهُ سُبُلَ السَّلَامِ وَيُخْرِجُهُمْ مِنَ الظُّلُمَاتِ إِلَى النُّورِ بِإِذْنِهِ وَيَهْدِيهِمْ إِلَى صِرَاطٍ مُسْتَقِيمٍ﴾ [المائدة: 16]
މާނައީ: "ﷲ، އެއިލާހު ރުއްސަވާ މަގަށް ތަބާވީ މީހަކަށް ސަލާމަތުގެ މަގަށް އެފޮތުން މަގު ދައްކަވަތެވެ. އަދި އެއިލާހުގެ އިޛުނަފުޅުން އަނދިރިކަމުގެ ތެރެއިން އަލިކަމުގެ ތެރެއަށް އެބައިމީހުން ނެރުއްވައެވެ. އަދި ސީދާވެގެންވާ ތެދުމަގަކަށް އެބައިމީހުންނަށް މަގުދައްކަވައެވެ."
މިއާޔަތުން އެނގިގެން މިދަނީ ފުރަތަމަ ކަމަކީ ތިމާ ﷲ ތަޢާލާއަށް ތަބާވުންކަމެވެ. "ﷲ، އެއިލާހު ރުއްސަވާ މަގަށް ތަބާވީ މީހަކަށް ސަލާމަތުގެ މަގަށް އެފޮތުން މަގު ދައްކަވަތެވެ." އޮތުމުންނެވެ. އަދި " އެއިލާހުގެ އިޛުނަފުޅުން އަނދިރިކަމުގެ ތެރެއިން އަލިކަމުގެ ތެރެއަށް އެބައިމީހުން ނެރުއްވައެވެ. އަދި ސީދާވެގެންވާ ތެދުމަގަކަށް އެބައިމީހުންނަށް މަގުދައްކަވައެވެ." މިއޮތީ އެއިގެ ފަހަތުންނެވެ.
އެނގިގެން މިދިއައީ ފުރަތަމަ ކަމަކީ ތަބަޢަވާންވީ އެންމެ ފުރިހަމަ ގޮތުގައި ﷲ ތަޢާލާއަށް ތަބަޢަވުންކަމެވެ. އެއީ އެންމެ ފުރިހަމަގޮތުގައި ﷲ ތަޢާލާއަށް ކިޔަމަންތެރިވެ ﷲ ތަޢާލާގެ އެންގެވުންތަކަށް އެންމެ ފުރިހަމަގޮތުގައި ޢަމަލުކުރުމެވެ. އެކަންކަން ފުރިހަމަކުރުމުން ހިދާޔަތު ނުލިބިއެއް ނުދާނެއެވެ! އިން ޝާ ﷲ
- އިސްލާމީ ތިލަފަތުގެ ދަރުސަކުން
