ކޮންމެ މުސްލިމަކުވެސް އެންމެ ބޮޑަށް ރައްކައުތެރިވާން އޮތީ ފަރުޟު ނަމާދުތަކަށެވެ. ހަމައެއާއިއެކު ރައްކައުތެރިވާންވީ ﷲ ތަޢާލާ ޙަރާމް ކުރެއްވެވި ނުވަތަ ނަހީކުރައްވަވާފައިވާ އެއްވެސް ކަމެއް ނުކުރުމަށެވެ. މި ދެ ކަންތަކަށް ދޭންޖެހޭ ސަމާލުކަންދޭ އަޅުންނަށް، އެމީހަކަށް އިތުރަށް ބޭނުންވާ ކަންކަން ﷲ ތަޢާލާ ފުއްދަވައިދެއްވަވާނެތެވެ. އިން ޝާ ﷲ
ﷲ ތައާލާއަށް ބިރުވެތިވެ ޙަރާމްކަމެއް ކުރުމުން ދުރުހެލިވެގެންފި މީހަކަށް ﷲ ތައާލާ ދެއްވަވާނެ ނިޢްމަތްތައް ގުނައި ވަޒަނެއް ނުކުރެވޭނެއެވެ. މިހެން ބުނީމާ ތިއަކިޔަނީ ކީކޭތޯ ސުވާލު ކުރާނެ ބައަކު އުޅޭނެއެވެ.
އެންމެ ނަމާދެއް އެޅުއްވެވިގެން އެކަމުގެ ބިރުފުޅަށް ސުލައިމާންގެފާނު އުދުހޭ އަސްތައް ޤުރްބާން ކުރެއްވެވުމުން ދަތުރުފުޅު ކުރައްވަވަން ވައި ނުދެއްވަވާހެއްޔެވެ؟ ﷲ ތަޢާލާއަށް ބިރުފުޅުން ޒިނޭ ނުކުރެއްވެވުމުން ޔޫސުފްގެފާނަށް މިޞުރުގެ ވެރިކަން ނުދެއްވަވާ ހެއްޔެވެ؟
ލޮބުވެތި އަޚުންނާއި އުޚުތުންނޭވެ! ހަމަ މިއަދުވެސް ﷲ ތަޢާލާ މީސްތަކުންނަށް ނިޢްމަތްތައް ނުދެއްވަވަނީއެއް ނޫނެވެ. އިންތިހާއަށް ބޮޑެތި، ގިނަގުނަ ނިޢުމަތްތައް ދެއްވަވައެވެ. އެކަމަކު މިއަދު ވެގެން މިއުޅޭ ގޮތަކީ ﷲ ތަޢާލާ ދެއްވަވާ ނިޢްމަތްތައް ވަޒަން ނުކުރެވެނީއެވެ. ނިޢްމަތްތައް ލިބުމުން އެއީ ﷲ ތަޢާލާ ދެއްވެވި ނިޢްމަތް ކަމަށް ޤަބޫލުނުކުރެވެނީއެވެ.
ކިތަންމެ ބޮޑު އުފާވެރިކަމެއް ލިބެން އޮތް ނަމަވެސް ﷲ ތަޢާލާ ޙަރާމް ކުރެއްވެވި ކަމަކަށް އަރައިނުގަންނާށެވެ. ﷲ ތަޢާލާއަށް ބިރުވެތިވެ އެފާފައެއް ކުރުމުން ދުރުހެލިވާށެވެ. އެމީހަކަށް ﷲ ތަޢާލާ ނިޢްމަތްތައް އިތުރުކުރައްވަވައި ދެއްވަވާނެތެވެ. އެމީހެއްގެ ދަރަޖަ މަތިވެރިކުރައްވަވާނެތެވެ. އެމީހަކު ބާރުވެރިކުރައްވަވާނެތެވެ. އިން ޝާ ﷲ
--އުސްތާޛް ވައްހާޖް ޠަރިންގެ ދަރުސަކުން
