އިސްލާމީ ކަންތައްތަކާބެހޭ ވުޒާރާއިން ހާމަކުރި ގޮތުގައި، ދިވެހިރާއްޖޭގެ ރައްޔިތުން ދެއްކި ފިތުރު ޒަކާތުފައިސާއިން ބައިމިލިއަން ދިވެހި ރުފިޔާގެ ކާބޯތަކެތި ފަލަޞްޠީނުގެ ޣައްޒާގެ ރައްޔިތުންނަށް ފޯރުކޮށްދީފިއެވެ.
އިސްލާމީ ކަންތައްތަކާބެހޭ ވަޒީރު ޑރ. މުޙައްމަދު ޝަހީމް ޢަލީ ސަޢީދު ވިދާޅުވި ގޮތުގައި، މިއަހަރުގެ ފިތުރު ޒަކާތުގެ ގޮތުގައި 13.3 މިލިއަން ރުފިޔާ ލިބުނެވެ. އޭގެ ތެރެއިން ބައެއް ޣައްޒާގައި ހާލުގައި ޖެހިފައިވާ މީހުންނަށް އެހީ ފޯރުކޮށްދިނުމަށް އިސްލާމީ ކަންތައްތަކާބެހޭ ވުޒާރާއިން ނިންމިއެވެ.
"ޒަކާތު ހައުސްއަށް ދިވެހި ރައްޔިތުން ހަވާލުކުރި ފިތުރު ޒަކާތުން ފަލަޞްޠީނުގެ ޣައްޒާގެ ބަނޑުހައި ހޫނުކަމުގައި ޖެހިފައިވާ އާއިލާތަކަށް ފޮނުވި ބައިމިލިއަން ދިވެހި ރުފިޔާގެ ކާބޯތަކެތި އެމީހުންނަށް ފޯރުކޮށްދެވިއްޖެ،" ޑރ. ޝަހީމް ވިދާޅުވިއެވެ. މި އެހީ ފޯރުކޮށްދިނުމުގައި އިސްރާ އެސޯސިއޭޝަންގެ އެހީތެރިކަން ލިބުނު ކަމަށްވެސް އެމަނިކުފާނު ފާހަގަކުރެއްވިއެވެ.
މީގެ އިތުރުން، މިދިޔަ އަހަރު ފުރަތަމަ ފަހަރަށް ޒަކާތު ފަންޑުންވެސް ޣައްޒާގެ ރައްޔިތުންނަށް އެހީތެރިކަން ފޯރުކޮށްދިން ކަމަށް ވަޒީރު ހާމަކުރެއްވިއެވެ. އެގޮތުން 1 ލައްކަ ޑޮލަރުގެ އެހީއެއް ފޯރުކޮށްދީފައިވާ ކަމަށާއި، މި ފައިސާ ޚަރަދުކުރުމަށް ހަމަޖެހިފައިވަނީ ޣައްޒާގެ ރައްޔިތުންނަށް ސާފު ބޯފެން ފޯރުކޮށްދިނުމަށް ޤަތަރު ރެޑްކްރެސެންޓް ސޮސައިޓީން ކުރިއަށް ގެންދާ މަޝްރޫއަށް ކަމަށްވެސް އެމަނިކުފާނު ވިދާޅުވިއެވެ.
މި އެހީ ފޯރުކޮށްދިނުމަކީ ދިވެހި ރައްޔިތުންގެ ހިތްހެޔޮކަމާއި އިސްލާމީ އުޚުއްވަތްތެރިކަމުގެ ރަމްޒެއް ކަމަށް ވަޒީރު ފާހަގަކުރެއްވިއެވެ. އަދި ކުރިއަށް އޮތް ތަނުގައިވެސް ޣައްޒާގެ ރައްޔިތުންނަށް އެހީތެރިވުމަށް ދިވެހި ސަރުކާރުން މަސައްކަތްކުރާނެ ކަމަށް އެމަނިކުފާނު ވިދާޅުވިއެވެ.
ޒަކާތުފައިސާއިން ބައިމިލިއަން ރުފިޔާގެ ކާބޯތަކެތި ޣައްޒާގެ ރައްޔިތުންނަށް ފޯރުކޮށްދީފި
