ރައްޔިތުންނަށް އިތުރު ލުޔެއް ހޯދައިދިނުމުގެ ގޮތުން، މިފެށޭ ޖޫން މަހުން ފެށިގެން ގޭބިސީތަކުގެ ކަރަންޓު ޓެރިފް ރޭޓްތައް ކުޑަކުރުމަށް ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ނިންމަވައިފިއެވެ.
މިކަން އިޢުލާނު ކުރައްވަމުން ރައީސުލްޖުމްހޫރިއްޔާ ސޯޝަލް މީޑިއާގައި ހިއްސާކުރެއްވި ޕޯސްޓެއްގައި ވިދާޅުވެފައިވަނީ، 1 ޖޫން 2025 އިން ފެށިގެން ޑޮމެސްޓިކް ކެޓެގަރީގެ ކަރަންޓު ޓެރިފް ރޭޓްތަކަށް މުހިންމު ބަދަލުތަކެއް ގެންނަވާނެ ކަމަށެވެ. އަދި މި ބަދަލުތައް ދެމެހެއްޓެނިވި ގޮތެއްގައި ތަންފީޒުކުރުމަށްޓަކައި، ކަމާގުޅުންހުރި އިދާރާތަކަށް އަންގަވާފައިވާ ކަމަށްވެސް ރައީސް ވަނީ ފާހަގަކުރައްވާފައެވެ.
މި ނިންމެވުމާއެކު، ރައީސުލްޖުމްހޫރިއްޔާ ވަނީ ގޭބިސީތަކުގެ ކަރަންޓު ޓެރިފް ރޭޓްތަކަށް ގެންނަވާ ބަދަލުތަކުގެ ތަފްސީލީ މަޢުލޫމާތު ހާމަކުރައްވާފައެވެ. މީގެ ތެރޭގައި މިހާރު ޢަމަލުކުރަމުންދާ އަގުތަކާއި، އަލަށް ތަޢާރަފުކުރެވޭ އަގުތަކުގެ ތަފްސީލު ހިމެނެއެވެ.
މި ބަދަލުތަކަކީ ރައްޔިތުންގެ ދިރިއުޅުމަށް ފަހިކަމެއް ގެނެސްދޭނެ ކަމެއްގެ ގޮތުގައި ބެލެވޭއިރު، ޚާއްޞަކޮށް ކަރަންޓު ބިލުތަކުގެ ސަބަބުން ރައްޔިތުންނަށް ކުރިމަތިވަމުންދާ މާލީ ބުރަތަކަށް ލުޔެއް ލިބިގެންދާނެ ކަމަށް އުންމީދުކުރެވެއެވެ.
1 ޖޫން 2025 އިން ފެށިގެން ޑޮމެސްޓިކް ކެޓެގަރީގެ ކަރަންޓު ޓެރިފް ރޭޓް ތިރީގައިވާ ގޮތަށް ކުޑަކޮށް، އެ ކަން ތަންފީޒުކުރުމުގައި ދެމެހެޢްޓެނިވި ގޮތެއްގައި މެނޭޖްކުރުމަށް ކަމާބެހޭ ފަރާތްތަކުން ކުރައްވަންޖެހޭ އެންމެހާ ކަންކަން ކުރެއްވުމަށް ދަންނަވާފައިވާނެ ވާހަކަ ދަންނަވަން. pic.twitter.com/2SsaM6CGOQ
— Dr Mohamed Muizzu (@MMuizzu) May 30, 2025
