ޓޫރިޒަމް އަދި އެންވަޔަރަންމަންޓް މިނިސްޓަރ ޠާރިޤު އިބްރާހިމް، ނ. ކެނދިކުޅުދޫ ނޭޗަރ ޕާކް ވިޒިޓަރ ސެންޓަރަށް، 'މެންގްރޯވް ސެންޓަރު'ގެ ނަމުގައި، ބިންގާ އެޅުއްވުމުގެ ރަސްމިއްޔާތު ބާއްވައިފިއެވެ.
މި ސެންޓަރަކީ ރަށްފުށުގެ ފަތުރުވެރިކަން ކުރިއެރުވުމަށް (އީކޯ-ޓޫރިޒަމް)، ތިމާވެއްޓާބެހޭ ތަޢުލީމު ދިނުމަށް، އަދި ގުދުރަތީ ރީތިކަން ހުރި ތަންތަނުގައި މަޖާކޮށްލުމަށް ޚާއްސަ މަރުކަޒެއްގެ ގޮތުގައި ޚިދުމަތް ދޭނެ ތަނެކެވެ. މި ސެންޓަރުގެ ސަބަބުން، ކެނދިކުޅުދޫގެ ދޮންކަނޑި (މެންގްރޯވް) ފަދަ މުއްސަނދި ގުދުރަތީ ވަސީލަތްތަކާ ފަތުރުވެރިންނަށާއި ރަށްވެހިންނަށް ގުޅިލާމެހުމުގެ ފުރުސަތު އިތުރުވެގެންދާނެއެވެ. މީގެ އިތުރުން، މި މަސައްކަތުގެ ސަބަބުން ކެނދިކުޅުދޫގެ މުޖުތަމަޢަށް އެހީތެރިވެ، ދިރިއުޅުމަށް ފުރުސަތުތައް ފަހިވެގެންދާނެއެވެ.
މި މަސައްކަތަކީ، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، ކޮންމެ އަތޮޅަކުން އެއް ނޭޗަރ ޕާކް ޤާއިމްކުރުމަށް ވެވަޑައިގެންފައިވާ ވައުދުގެ ތެރެއިން ހާސިލްކުރެވޭ މުހިންމު ކުރިއެރުމެކެވެ. މުސްތަޤްބަލަށް ޒިންމާދާރުކަމާއެކު ތަރައްޤީގެ މަސައްކަތްތައް ކުރިއަށްގެންދާއިރު، ރާއްޖޭގެ ރަށްތަކާއި މުޖުތަމަޢުތައް ދެމެހެއްޓެނިވި ގޮތެއްގައި ކުރިއެރުވުމަށްޓަކައި ގުދުރަތީ މާހައުލު ރައްކާތެރިކުރުމަށާއި، ގުދުރަތީ ވަސީލަތްތަކުން ފައިދާނެގޭނެ ފަދަ ތަޖުރިބާތައް ފޯރުކޮށްދިނުމަށް ސަރުކާރުން އަޒުމުކަނޑައަޅާކަން މިނިސްޓަރުގެ މި ހަރަކާތުން ދައްކުވައިދެއެވެ.
ހަބަރު: ސަރުކާރު
