ރާއްޖޭގެ 60 ވަނަ މިނިވަން ދުވަހާ ގުޅިގެން އަންނަ ސަރުކާރު ބަންދު ދުވަސްތަކުގައިވެސް އެ ހޮސްޕިޓަލުގެ ޚިދުމަތްތައް މެދުކެނޑުމެއްނެތި ކުރިއަށްދާނެ ކަމަށް އިންދިރާ ގާންދީ މެމޯރިއަލް ހޮސްޕިޓަލް (އައިޖީއެމްއެޗް) އިން މިއަދު ބުނެފިއެވެ.
އައިޖީއެމްއެޗުން ދެއްވި މައުލޫމާތުގައި، ޖުލައި 27 އަދި 28 ވަނަ ދުވަހަކީ ސަރުކާރު ބަންދު ދުވަސްތަކެއްގެ ގޮތުގައި ހަމަޖެހިފައިވީ ނަމަވެސް، ދަރުމަވަންތަ ހޮސްޕިޓަލް އައިޖީއެމްއެޗް އަދި ވިލިމާލެ ހޮސްޕިޓަލުން ފޯރުކޮށްދެމުންދާ އެންމެހައި ޚިދުމަތްތައް އާންމު ދުވަސްތަކެކޭ އެއްފަދައިން ކުރިއަށްދާނެ ކަމަށް ބަޔާންކޮށްފައިވެއެވެ.
މިނިވަން ދުވަހުގެ ޗުއްޓީގައި ވެސް ހޮސްޕިޓަލުގެ އިމަޖެންސީ ޑިޕާޓްމަންޓާއި، އެޑްމިޝަން ސަރވިސަސް އަދި އެހެނިހެން މުހިންމު ޚިދުމަތްތައް 24 ގަޑިއިރު ކުރިއަށްދާނެ ކަމަށް އައިޖީއެމްއެޗުން ފާހަގަކޮށްފައިވެއެވެ.
އައިޖީއެމްއެޗަކީ ރާއްޖޭގެ އެންމެ ބޮޑު ހޮސްޕިޓަލު ކަމަށްވެފައި، ގިނަ އަދަދެއްގެ ބަލިމީހުންނަށް ޚިދުމަތް ދެމުންދާ ތަނަކަށްވުމާއެކު، ބަންދު ދުވަސްތަކުގައި ވެސް ޚިދުމަތް މެދުނުކެނޑި ކުރިއަށްގެންދިއުމަކީ ވަރަށް މުހިންމު ކަމެކެވެ.
