ހައުސިންގ ޑިވެލޮޕްމަންޓް ކޯޕަރޭޝަން (އެޗް.ޑީ.ސީ)ގެ މެނޭޖިންގ ޑިރެކްޓަރުގެ މަޤާމަށް ދަފްތަރު ނަންބަރު 6544 ބްރިގޭޑިޔަރ ޖެނެރަލް (ރޓ) ޢަލީ ޒުހައިރު އައްޔަނުކުރައްވައިފިއެވެ. މި އައްޔަނުކުރެއްވުމާއެކު، އޭނާ ކުރިން ފުރުއްވަމުން ގެންދެވި ރޯޑް ޑިވެލޮޕްމަންޓް ކޯޕަރޭޝަން (އާރް.ޑީ.ސީ)ގެ މެނޭޖިންގ ޑިރެކްޓަރުކަމުގެ މަޤާމުން ވަކިކުރެވިފައިވެއެވެ.
ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީ.ސީ.ބީ) އިން މިކަން އިޢުލާނުކުރައްވަމުން ވިދާޅުވެފައިވަނީ، އާރް.ޑީ.ސީގެ މެނޭޖިންގ ޑިރެކްޓަރުގެ މަޤާމަށް މއ. އެލީޒިއަމް އިބްރާހީމް ނަޘީމް އައްޔަނުކުރައްވާފައިވާ ކަމަށެވެ.
އެޗް.ޑީ.ސީގެ މެނޭޖިންގ ޑިރެކްޓަރުގެ މަޤާމަށް މި ބަދަލު ގެނެވިފައިވަނީ، ކުރިން އެ މަޤާމުގައި ހުންނެވި މުޙައްމަދު މައުރޫފް ޖަމީލް އިސްތިއުފާ ދެއްވުމާ ގުޅިގެންނެވެ. އަދި މި ބަދަލާއެކު، ޢަލީ ޒުހައިރު އެޗް.ޑީ.ސީގެ އެންމެ އިސްވެރިޔާގެ މަޤާމު ފުރުއްވަން ފަށްޓަވާފައިވެއެވެ.
ޢަލީ ޒުހައިރަކީ ދިވެހި ސިފައިންގެ ޚިދުމަތުގައި ގިނަ ދުވަސްތަކެއް ވަންދެން ޚިދުމަތްކުރައްވާފައިވާ އަދި ބްރިގޭޑިޔަރ ޖެނެރަލްގެ މަޤާމާ ހަމައަށް ވަޑައިގެންފައިވާ ބޭފުޅެކެވެ. އަދި ރިޓަޔަރކުރެއްވުމަށްފަހު އާރް.ޑީ.ސީގެ މެނޭޖިންގ ޑިރެކްޓަރުގެ މަޤާމު ފުރުއްވަމުން ގެންދެވި ބޭފުޅެކެވެ.
