ޤައުމީ ދުވަސް ފާހަގަކުރުމުގެ ގޮތުން ހއ. އުތީމުގައި މާދަމާރޭ ހަވާއަރުވުމުގެ ރަސްމިއްޔާތެއް ބޭއްވުމަށް ވަނީ ހަމަޖެހިފައެވެ. މިއަހަރުގެ ޤައުމީ ދުވަހުގެ ރަސްމީ ހަރަކާތްތައް ބޭއްވުމަށް ހަމަޖެހިފައިވަނީ ހއ. އުތީމުގައެވެ.
ދިވެހި ބަހާއި ސަގާފަތާއި ތަރިކައާ ބެހޭ ވުޒާރާގެ ޑިރެކްޓަރ ޖެނެރަލް އާތިކާ އިބްރާހިމް ވިދާޅުވި ގޮތުގައި، އުތީމުގައި ޤައުމީ ދުވަހުގެ ހަރަކާތްތައް ދެ ދުވަހުގެ މުއްދަތަށް ކުރިއަށް ގެންދިއުމަށް ވަނީ ރޭވިފައެވެ. "އުތީމުގައިވެސް ދުވަހުގެ ހަރަކާތްތައް ފެށޭނީ ދިދަ ނެގުމުގެ ރަސްމިއްޔާތުން،" އާތިކާ ވިދާޅުވިއެވެ.
ޤައުމީ ދުވަހުގެ ހަރަކާތްތައް ދިވެހިރާއްޖޭގެ މީހުން ދިރިއުޅޭ ހުރިހާ ރަށެއްގައިވެސް ފެށޭނީ ހެނދުނު އޮންނަ ދިދަނެގުމުގެ ރަސްމިއްޔާތުންނެވެ. މާލޭގައި ބޭއްވޭ ދިދަނެގުމުގެ ރަސްމިއްޔާތުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ބައިވެރިވެ ވަޑައިގަންނަވާނެއެވެ.
ޤައުމީ ދުވަސް ފާހަގަކުރަން ސަރުކާރުން ފުރަތަމަ ފަށާފައިވަނީ މީލާދީން 1365 ވަނަ އަހަރުއެވެ. އޭގެ ފަހުން ކޮންމެ އަހަރަކުވެސް މި ދުވަސް ވަނީ ކުލަގަދަކޮށް ފާހަގަކުރަމުން ގެންގޮސްފައެވެ.
އުތީމުގައި މިފަހަރު ބޭއްވުމަށް ހަމަޖެހިފައިވާ ޤައުމީ ދުވަހުގެ ހަރަކާތްތަކަކީ ކުލަގަދަ އަދި ޚާއްޞަ ހަރަކާތްތަކަކަށް ވާނެކަމަށް ވުޒާރާއިން މަޢުލޫމާތު ދެއެވެ.
