ދައުލަތުގެ ބަންޑާރަނައިބުގެ އޮފީހުގެ 75 އަހަރު ފުރުމުގެ މުނާސަބަތުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ތަހުނިޔާގެ މެސެޖެއް ދެއްވައިފިއެވެ.
ރައީސުލްޖުމްހޫރިއްޔާ ދެއްވި މެސެޖުގައި، މި ވޭތުވެދިޔަ 75 އަހަރު ބަންޑާރަނައިބުގެ އޮފީހުގައި މަސައްކަތްކުރައްވާފައިވާ އެންމެހާ މުވައްޒަފުންނަށް ޝުކުރު އަދާކުރައްވާފައިވެއެވެ. އަދި އެ ބޭފުޅުންގެ އަގުހުރި ޚިދުމަތްތައް ފާހަގަކުރައްވާފައިވެއެވެ.
ވަކިން ޚާއްޞަކޮށް، މި މުއްދަތުގެ ތެރޭގައި ދައުލަތުގެ ބަންޑާރަނައިބުންގެ މަޤާމުގައި ޚިދުމަތްކުރައްވާފައިވާ އެންމެހާ ބޭފުޅުންނަށް ޚާއްޞަ އިޙްތިރާމާއި ޝުކުރު އަދާކުރައްވާފައިވެއެވެ. އަދި އެ ބޭފުޅުންގެ އަގު ވަޒަންކުރައްވައި، ހެޔޮ އެދުންތައް ފާޅުކުރައްވާފައިވެއެވެ.
ބަންޑާރަނައިބުގެ އޮފީހަކީ ދިވެހި ދައުލަތުގެ ޤާނޫނީ ވަކީލުގެ ދައުރު އަދާކުރާ އެންމެ އިސް މުއައްސަސާއެވެ. މި އޮފީހުން ދައުލަތަށް ޤާނޫނީ ލަފާ ދިނުމާއި، ދައުލަތުގެ މަޞްލަޙަތު ޙިމާޔަތްކުރުމުގެ މަސައްކަތް ކުރަމުން އަންނަތާ މިހާރު 75 އަހަރު ވެފައިވެއެވެ.
