ހދ. މަކުނުދޫގެ މަގުތައް ޒަމާނީ ފެންވަރަށް ތަރައްޤީ ކުރުމުގެ މަޝްރޫޢުގެ އެއްބަސްވުމުގައި މިއަދު މިނިސްޓްރީ އޮފް ކޮންސްޓްރަކްޝަން، ހައުސިންގ އެންޑް އިންފްރާސްޓްރަކްޗަރ އާއި ރޯޑް ޑިވެލޮޕްމަންޓް ކޯޕަރޭޝަން (އާރް.ޑީ.ސީ) އާ ދެމެދު ސޮއިކުރެވިއްޖެއެވެ.
މި އެއްބަސްވުމުގައި މިނިސްޓްރީގެ ފަރާތުން ސޮއިކުރެއްވީ މިނިސްޓަރ އޮފް ސްޓޭޓް ޙަސަން ރަޝީދު ކަމަށްވާއިރު، އާރް.ޑީ.ސީގެ ފަރާތުން ސޮއިކުރެއްވީ އެ ކުންފުނީގެ މެނޭޖިންގ ޑިރެކްޓަރ އިބްރާހީމް ނަޡީމްއެވެ.
މި މަޝްރޫޢު އާރް.ޑީ.ސީއާ ހަވާލުކުރެވިފައިވަނީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މަކުނުދޫގެ ރައްޔިތުންނާ ބައްދަލުކުރެއްވުމަށް ބޭއްވެވި ޖަލްސާގައި ނިންމެވި ގޮތުގެ މަތިންނެވެ. މި މަޝްރޫޢުގެ ދަށުން މަކުނުދޫގެ މަގުތައް ޒަމާނީ ފެންވަރަށް ތަރައްޤީކޮށް، ރަށުގެ މަގުތަކުގެ ވަށައިގެންވާ ސަރަޙައްދު ތަރައްޤީކުރެވިގެންދާނެއެވެ.
މި މަޝްރޫޢުގެ ސަބަބުން މަކުނުދޫގެ ރައްޔިތުންނަށް ލިބިގެންދާނެ ފަސޭހަތަކުގެ ތެރޭގައި ރަށުގެ މަގުތަކުގައި ދުއްވާ އުޅުމުގެ ފަސޭހަކަމާއި، ވާރޭވެހޭ މޫސުމުގައި ފެންބޮޑުވުމުގެ މައްސަލަ ޙައްލުވެގެން ދިއުން ހިމެނެއެވެ. އަދި މީގެ އިތުރުން ރަށުގެ މަގުތަކުގެ ރީތިކަން އިތުރުވެ، ރަށުގެ ޢުމްރާނީ ތަރައްޤީއަށް އިތުރު ކުރިއެރުމެއް ލިބިގެންދާނެއެވެ.
މި މަޝްރޫޢަކީ ސަރުކާރުން ރާއްޖޭގެ ރަށްރަށުގެ މަގުތައް ތަރައްޤީކުރުމަށް ކުރިއަށްގެންދާ ޕްރޮގްރާމްގެ ދަށުން ކުރިއަށްގެންދެވޭ މަޝްރޫޢެކެވެ. މި މަޝްރޫޢުގެ މަސައްކަތް އަވަހަށް ފެށި، ރައްޔިތުންނަށް މީގެ މަންފާ ލިބިގެންދާނެ ކަމަށް އުއްމީދު ކުރެވެއެވެ.
