ހުޅުމާލެ ދެވަނަ ފިޔަވަހީގައި އަލަށް ތަރައްޤީކޮށްފައިވާ "ޝަހީދު އަލީ ސްކޫލް" އާއެކު ކުރިއަށް އޮތް ދެ އަހަރު ދުވަހުގެ ތެރޭގައިވެސް ދަރިވަރުންނަށް ޖާގައިގެ އެއްވެސް ދަތިކަމެއް ނެތި ކިޔަވައިދެވޭނެ ކަމަށް ތަޢުލީމީ ވުޒާރާއިން އިއުލާނުކޮށްފިއެވެ.
ތަޢުލީމީ ވުޒާރާގެ ސްޓޭޓް މިނިސްޓަރ ހުސައިން ސަޢީދު މުޙައްމަދު ދައުލަތުގެ މީޑިއާއަށް ދެއްވި މަޢުލޫމާތުގައި ވިދާޅުވި ގޮތުގައި، މިހާރުވެސް "ޝަހީދު އަލީ ސްކޫލް" އަށް ދަރިވަރުން ވެއްދުމުގެ މަސައްކަތް ވަނީ ފެށިފައެވެ. އަދި މިހާތަނަށް މާލެ އާއި ހުޅުމާލެއިން 600 އަށްވުރެ ގިނަ ދަރިވަރުން ވަނީ އެ ސްކޫލަށް ވަނުމަށް ޝައުގުވެރިކަން ފާޅުކޮށްފައެވެ.
"ފޭސް 2ގައި ދިރިއުޅޭ ދަރިވަރުންގެ ތެރެއިން ޖާގަ ބޭނުންވާ ހުރިހާ ދަރިވަރުންނަށް ޖާގަ ލިބޭނެ. ސަލާހުއްދީންއާއި ޝަހީދު އަލީ މި ދެ ސްކޫލް ހުރުމާއެކު، މި ފެށޭ ދިރާސީ އަހަރު އަދި 2027 އަށްވެސް ޖާގައިގެ ދަތިކަމެއް ނެތި ދަރިވަރުންނަށް ޖާގަތައް މަގުފަހިކޮށްދެވޭނެ،" ސްޓޭޓް މިނިސްޓަރ ވިދާޅުވިއެވެ.
އަތޮޅުތަކުންނާއި މާލެއިން އަންނަ ދަރިވަރުންނަށްވެސް ސްކޫލުން ޖާގަ ލިބޭނެކަން ސްޓޭޓް މިނިސްޓަރ ފާހަގަކުރެއްވިއެވެ. މީގެއިތުރުން، ހުޅުމާލެ ދެވަނަ ފިޔަވަހީގައި ގްރޭޑް 10 އާ ހަމައަށް ކިޔަވައިދޭ އިތުރު ސްކޫލެއްވެސް ހުންނާނެކަމަށް އެ މިނިސްޓްރީން މަޢުލޫމާތު ދީފައިވެއެވެ.
މި ތަރައްޤީގެ މަޝްރޫޢުތަކާއެކު، ހުޅުމާލޭގެ ދެވަނަ ފިޔަވަހީގައި ދިރިއުޅޭ ރައްޔިތުންނަށް ތަޢުލީމީ ދާއިރާއިން ލިބޭ ޚިދުމަތްތައް އިތުރަށް ފުޅާވެގެންދާނެ ކަމަށް ބެލެވެއެވެ.
