އަމިއްލައަށް އިސްނަގައިގެން އެ ފުލުހެއްގެ ދާއިރާއިން ކުރިއެރުމަށް ކޮންމެ ފުލުހަކުވެސް މަސައްކަތްކުރުމަށް ދާޚިލީ ސަލާމަތާ ފަންނިއްޔާތާބެހޭ ވަޒީރު ޢަލީ އިޙްސާން ފުލުހުންނަށް އިލްތިމާސްކުރައްވައިފިއެވެ.
ފުލުހުންގެ ޚިދުމަތުގެ ދުވަސް ފާހަގަކުރުމަށް ބޭއްވި ރަސްމިއްޔާތުގައި ވާހަކަފުޅު ދައްކަވަމުން ވަޒީރު ވިދާޅުވީ، ފުލުހުންނަށް ބޭނުންވާ ވަޞީލަތްތައް ހޯދައިދީ، ބިނާރުތައް ޤާއިމުކޮށް، ފުލުހުން ތަމްރީންކުރުމަށް ސަރުކާރުން ޚާއްސަ އިސްކަމެއް ދެއްވާ ކަމަށެވެ.
މި ރަސްމިއްޔާތުގައި ވަޒީރު އަލީ އަޅުއްވާލައްވާފައިވަނީ ވަޞީލަތެއް ލިބެންދެން މަޑުނުކޮށް، އެ ފުލުހެއްގެ ދާއިރާއިން ކުރިއެރުމަށް އަމިއްލައަށް އިސްނަގައިގެން ކޮންމެ ފުލުހަކުވެސް މަސައްކަތްކުރުމުގެ މުހިންމުކަމަށެވެ.
"ވަކިން މީހަކު އައިސް ވަޞީލަތެއް ހޯދައިދޭން އުޅުމުގެ ބަދަލުގައި، ކަމެއް ނުވަނީސްވެސް އެ މީހެއްގެ ދާއިރާގައި ބަދަލުވަމުން އަންނަ ދުނިޔެއާ އެއްގޮތަށް ޒަމާނީ ފަހުގެ ވަޞީލަތްތަކާއި ތަމްރީނުތައް ދެނެގަނެ ވެރިންނާ ހަމައަށް ގެނެސް، އެކަންކަން ފަހިކުރުމަށް އާދަޔާ ޚިލާފަށް މަސައްކަތްކުރަން އަޅުގަނޑު އެދެން،" ވަޒީރު ވިދާޅުވިއެވެ.
ފުލުހުންގެ ޚިދުމަތުގެ ފެންވަރު މަތިކޮށް، ޒަމާނީ ވަޞީލަތްތަކާއި ތަމްރީނުތައް ހޯދުމަށް ސަރުކާރުން ގެންގުޅުއްވާ ސިޔާސަތުގެ ދަށުން، ކޮންމެ ފުލުހަކީވެސް އަމިއްލައަށް ކުރިއެރުމަށް މަސައްކަތްކުރާ ބަޔަކަށް ހެދުމަށް ސަރުކާރުން މަސައްކަތްކުރައްވާކަން ވަޒީރުގެ ވާހަކަފުޅުން ފާހަގަކުރެވެއެވެ.
މި ރަސްމިއްޔާތުގައި ވަނީ ފުލުހުންގެ ޚިދުމަތުގައި ދިގު މުއްދަތެއްގައި ޚިދުމަތް ކުރައްވާފައިވާ މުވައްޒަފުންނަށް ހަނދާނީ ފިލާ ދީފައެވެ. އެގޮތުން ފުލުހުންގެ ޚިދުމަތުގައި 35 އަހަރު، 30 އަަހަރު، 25 އަހަރު އަދި 20 އަހަރަށްވުރެ ދިގު މުއްދަތެއްގައި ޚިދުމަތްކުރައްވާފައިވާ 150 މުވައްޒަފުންނަށް ހަނދާނީ ފިލާ ދީފައިވެއެވެ. މި މުވައްޒަފުންނަށް ހަނދާނީ ފިލާ ހަވާލުކޮށްދެއްވީ ދާހިލީ ސަލާމަތާއި ފަންނިއްޔާތާ ބެހޭ ވަޒީރު ޢަލީ އިހުސާންއެވެ.
މިއަދު ފާހަގަކުރާ ފުލުހުންގެ ޚިދުމަތު ދުވަހަކީ 2004 ވަނަ އަހަރު ދިވެހި ފުލުހުންގެ މުއައްސަސާ ވަކި މުއައްސަސާއެއްގެ ގޮތުގައި އުފެދި ޚިދުމަތްދޭން ފެށި ދުވަހެވެ. އެގޮތުން މިއަހަރު ފާހަގަކުރަމުންދަނީ ދިވެހި ފުލުހުންގެ މުއައްސަސާ ވަކި މުއައްސަސާއެއްގެ ގޮތުގައި އުފެދި ޚިދުމަތްދޭތާ 21 ވަނަ އަހަރެވެ.
