ޢިލްމީ މައިދާނުގައި ސަނަދު ޙާޞިލްވުމުން އުނގެނުމުގެ މަރުޙަލާ ނުނިމޭ ކަމަށް މިނިސްޓަރ އޮފް ސިޓީސް ލޯކަލް ގަވަރމަންޓް އެންޑް ޕަބްލިކް ވަރކްސް އޮނަރަބްލް އާދަމް ޝަރީފު ޢުމަރު ވިދާޅުވެއްޖެއެވެ. މިނިސްޓަރ މިހެންވިދާޅުވީ ވިލާ ކޮލެޖުގެ 2025 ވަނަ އަހަރުގެ ގްރެޖްއޭޝަންގެ ފުރަތަމަ ސެޝަން ޝަރަފުވެރިކޮށްދެއްވާ މިއަދު ހެނދުނު ދެއްކެވި ވާހަކަފުޅުގައެވެ.
މިނިސްޓަރ ވިދާޅުވީ އުނގެނުމަކީ މުޅި ޢުމުރުގައި ވެސް ކުރަންޖެހޭ ކަމެއް ކަމަށެވެ. ޚާއްޞަކޮށް ބަދަލުވަމުންދާ ދުނިޔޭގައި، ކަންކަމަށް އިންތިހާއަށް ބަދަލު އަންނަ އިރު، ކަންކަމާއި، ވަސީލަތްތައް ހީނުކުރާހާ އަވަހަށް ބަދަލުވަމުންދާ ޒަމާނެއްގައި އުނގެނުމަކީ އަބަދުވެސް ކުރަންޖެހޭ ކަމެއް ކަމަށެވެ.
"Life Long Learning އަކީ ތިމާގެ ދިރިއުޅުމުގެ ބައެއް ކަމަށް ހަދަންޖެހޭ. މަންމަގެ އުނގުން ފެށިގެން ކަށްވަޅަށް ދާންދެން އުނގެނުމަކީ މޮޓޯކަމުގައި ހަންޖެހޭ" މިނިސްޓަރ ވިދާޅުވިއެވެ.
ވިލާ ކޮލެޖުގެ 2025 ވަނަ އަހަރުގެ ގްރެޖްއޭޝަންގެ ފުރަތަމަ ސެޝަން ޝަރަފުވެރިކޮށްދެއްވާ މިނިސްޓަރ މިއަދު ދެއްކެވިވާހަކަފުޅުގައި ރާއްޖޭގެ ވަޒީފާގެ ބާޒާރުގައި ވަޒީފާ އުފައްދާނެ ފަރާތައް މިއަދު އިތުރުކުރަންޖެހޭ ކަމަށް ވިދާޅުވިއެވެ. މަދަރުސީ ތަޢުލީމުގެ މަރުޙަލާއިން ފެށިގެން މަތީ ތަޢުލީމުގެ މަރުޙަލާގައި ވެސް ވަޒީފާތައް އުފައްދާނެ ގޮތުގެ ވިސްނުމާއި، ސިވިލް ސަރވިސް ނުވަތަ ސިޔާސީ ވަޒީފާތަކަށް ވުރެ ބޮޑަށް އަމިއްލައަށް އާމްދަނީ ހޯދޭނެ ވިސްނުމާއި، އަމިއްލައަށް ވަޒީފާ އުފެއްދޭނެ ޤާބިލުކަން އިތުރުކުރުމަށް ސަމާލުކަން ދޭންޖެހޭ ކަމަށް މިނިސްޓަރ އާދަމް ޝަރީފު ޢުމަރު ވިދާޅުވިއެވެ.
"ޤައުމުގައި ހިނގަމުންދާ ކަންކަމުގެ ވާހަކަ ހަމައެކަނި އެ އިރެއްގައި އޮންނަ ސަރުކާރަކުން ނުވަތަ ސަރުކާރާ ވާދަވެރި ފަރާތްތަކުން ދެއްކުމަކުން ޙަޤީޤީ މަންޒަރެއް ރައްޔިތުންނަކަށް މުޅިން ސާފެއް ނުވޭ. އެ ވާހަކަތައް ހަމައެކަނި ސިޔާސީ މީހުން ދެއްކުމަކުން ނުފުދެ" މިނިސްޓަރ ވިދާޅުވިއެވެ.
މިނިސްޓަރ ވިދާޅުވީ ޤައުމު ބުނާކުރުމުގައި ތަޢުލީމީ ޒުވާނުންގެ އެހީތެރިކަން ޤައުމަށް މި ވަނީ އިންތިހާއަށް ބޭނުންވެފައި ކަމަށެވެ. ޚާއްޞަކޮށް ރާއްޖޭގައި ހިނގަމުންދާ ކަންކަން، ޢިލްމީ ދިރާސާތަކުގެ އަލީގައި ރައްޔިތުންނަށް ސާފުކޮށްދިނުމުގައި ތަޢުލީމީ ޒުވާނުންގެ އެހީތެރިކަން އިންތިހާއަށް ބޭނުން ކަމަށެވެ.
މީގެއިތުރުން މިނިސްޓަރ ވިދާޅުވީ މީގެ އަހަރުތަކެއް ކުރިން ތަޢުލީމު ޙާޞިލްކުރުމުގެ ފުރުޞަތު ލިބެނީ ވެރިން ހުއްދަ ދެއްވި މިންވަރަކުން ހުއްދަ ދެއްވި ބަޔަކަށް ކަމަށެވެ.
މިނިސްޓަރ ވިދާޅުވީ އިހު ޒަމާނުގައި ތަޢުލީމު ޙާޞިލްކުރި ބައެއް މީހުން ތަޢުލީމު ޙާޞިލްކުރީ ސިއްރިއްޔާތުގައި ރާއްޖެ ދޫކޮށް ފިލައިގެން ގޮސްގެން ކަމަށެވެ. ނަމަވެސް އަދުގެ ޒުވާނުންނަކީ ނަސީބުވެރި ބައެއް ކަމަށް މިނިސްޓަރ ވިދާޅުވިއެވެ. ތަޢުލީމީ ފުރުޞަތުތައް އިންޓަރނޭޝަނަލް ސުކޫލުތަކާއި، ކޮލެޖުތަކާއި، ޔުނިވަރސިޓީތަކުން ތަންމިނަށް އަދުގެ ޒުވާނުންނަށް ހުޅުވިފައިވާ ކަމަށް މިނިސްޓަރ ވިދާޅުވިއެވެ.
"މިއަދުގެ ކިޔަވައިދިނުމުގައި ތެކްނޮލޮޖީގެ އެހީތެރިކަމާއި ޒަމާނީ ލުއިފަސޭހަކަން ސުކޫލުތަކަށް ލިބިފައި ވިޔަސް، ރާއްޖޭގެ ފަށާ ތަޢުލީމުގެ ބިންގާ އެޅިގެން ދިޔަ ދުވަސްވަރު ފުޅިބައްތީގެ އަލީގައި ފޮތް މާކުކޮށް، ޓީޗިންގ އެއިޑްސް ހަދައި، ފްލެނަލް ބޯޑުގައި ޓީޗިންގ އެއިޑްސް ހަރުލެއްވުމަށް، ތަތްކުރުމަށް ބަނބުކެޔޮ ފަތް ބޭނުންކުރި ހަނދާން މިއަދުވެސް އެބަހުރި" މިނިސްޓަރ ވިދާޅުވިއެވެ.
ވިލާ ކޮލެޖުގެ 2025 ވަނަ އަހަރުގެ ގްރެޖްއޭޝަންގެ ފުރަތަމަ ސެޝަން ޝަރަފުވެރިކޮށްދެއްވާ މިނިސްޓަރ މިއަދު ދެއްކެވިވާހަކަފުޅުގައި ރާއްޖޭގެ ތަޢުލީމާއި، ޞިއްޙީ ދާއިރާ ފަދަ އެތައް ދާއިރާތަކަކުން ހެޔޮ ބަދަލުތަކެއް މިއަދު ޤައުމަށް އައިސްފައިވާ ކަމަށް ވިދާޅުވިއެވެ. އަދި ހެޔޮ ބަދަލުތައް އައުމުގެ ސިއްރަކީ އުނގެނުމަށް، ތަޢުލީމަށް ލޯބިކުރާ ބަޔަކަށް ދިވެހިންވުން ކަމަށް ވިދާޅުވިއެވެ. ތަރައްޤީއަށް ލޯބިކުރާ ބަޔަކަށްވުން ކަމަށް ވިދާޅުވިއެވެ.
