އެމްޑީޕީގެ އެއްވުމުގައި ފުލުހުންގެ ވާޖިބަށް ހުރަސްއެޅި ފަރާތްތަކަށް ޤާނޫނީ ފިޔަވަޅު އަޅާނެކަމަށް ދިވެހި ފުލުހުންގެ ހިދުމަތުން މިރޭ ވަނީ ބުނެފައެވެ.
ފުލުހުން ނެރުނު ބަޔާނުގައި ބުނެފައިވާ ގޮތުގައި، އެމްޑީޕީން މިރޭ މާލޭގައި ބޭއްވި އެއްވުމުގައި، ކުރިން ހުއްދަ ދެވިފައިވާ ރޫޓާ ހިލާފަށް މަޖީދީމަގުން ކުރިއަށްދާން ފެށުމާ ގުޅިގެން، އެގޮތަށް އަމަލު ނުކުރުމަށް ތަކުރާރުކޮށް ނަސޭހަތްތެރިވެ، އިންޒާރު ދީފައިވާކަމަށެވެ.
ނަމަވެސް، ފުލުހުންގެ އިންޒާރުތަކަށް އިޖާބަ ނުދީ، އެއްވުމުގެ ބައިވެރިން ވަނީ ފުލުހުންނާ ދިމާލަށް ގަލާއި ފެންފުޅި އުކައި، ފުލުހުންގެ އާލާތްތައް އަތުލަން މަސައްކަތްކޮށްފައެވެ. މީގެ އިތުރުން ފުލުހުންގެ ވާޖިބު އަދާކުރުމަށް ހުރަސްއަޅާފައިވާކަމަށް ފުލުހުން ބުނެއެވެ.
"މި އަމަލުތައް ހިންގި ފަރާތްތަކާމެދު ގާނޫނީ ފިޔަވަޅު އަޅާނެ ވާހަކަ ދަންނަވަމެވެ. އަދި ހަމައެއާއެކު، ފުލުހުންގެ ވާޖިބު އަދާކުރުމަށް ހުރަސްނޭޅުމަށް އެންމެހައި ފަރާތްތަކަށް ނަސޭހަތްތެރިވަމެވެ،" ފުލުހުންގެ ބަޔާނުގައި ބުނެފައިވެއެވެ.
އެމްޑީޕީން މިރޭ ބޭއްވި އެއްވުމަކީ ސަރުކާރުގެ ސިޔާސަތުތަކާ ދެކޮޅަށް ބޭއްވި އެއްވުމެކެވެ. މި އެއްވުމުގައި ގިނަ އަދަދެއްގެ ޕާޓީގެ މެންބަރުންނާއި ތާއީދުކުރާ ފަރާތްތައް ބައިވެރިވިއެވެ.
