ކޯވިޑް-19 އާ ގުޅިގެން ވެންޓިލޭޓަރު ގަތުމުގެ މައްސަލައިގައި، 7 ދުވަހުގެ ތެރޭގައި ދިވެހި ދައުލަތުން 37 މިލިޔަން ރުފިޔާ ދެއްކުމަށް ދުބާއީގެ ކޯޓުން އަމުރުކޮށްފިއެވެ.
މި މައްސަލައާ ގުޅޭގޮތުން ދައުލަތުގެ މީޑިއާއަށް މަޢުލޫމާތު ދެއްވަމުން، ބަންޑާރަ ނައިބު އަޙްމަދު އުޝާމް ވިދާޅުވި ގޮތުގައި، އާބިޓްރޭޝަނުން ނިންމި ނިންމުމާ ގުޅިގެން މައްސަލަ ދުބާއީގެ ކޯޓަށް ހުށަހެޅުމުން، ވެންޓިލޭޓަރުތައް ހޯދުމަށް ދިވެހި ސަރުކާރުން ދެއްކި 32 މިލިޔަން ރުފިޔާއާއި، އެ ފައިސާ ދައްކާ މުއްދަތާ ހަމައަށް އިންޓްރެސްޓްގެ ގޮތުގައި އަރާ ފައިސާ، އަދި އާބިޓްރޭޝަނަށް ދައުލަތުން ކުރި ޚަރަދު އަނބުރާ ދިނުމަށް ކޯޓުން ވަނީ އަމުރުކޮށްފައެވެ.
"ކޯޓުގެ އަމުރާ އެއްގޮތަށް 7 ދުވަހުގެ ތެރޭގައި ދައުލަތުން ފައިސާ ނުދައްކައިފިނަމަ، އާބިޓްރޭޝަނުގެ އެވޯޑު ތަންފީޒުކުރުމަށްޓަކައި އަޅުގަނޑުމެން ކުރަންޖެހޭ މަސައްކަތްތައް ކުރާނަން،" ބަންޑާރަ ނައިބު ވިދާޅުވިއެވެ.
މި މައްސަލައިގެ ފަހަތަށް ބަލާއިރު، ކޯވިޑް-19 އާ ގުޅިގެން ވެންޓިލޭޓަރު ހޯދުމަށް ހެލްތު މިނިސްޓްރީއާއި ދުބާއީގެ ކުންފުންޏެއް ކަމަށްވާ އެގްޒެކިއުޓަރސް ޖެނެރަލް ޓްރޭޑިންގއާ ދެމެދު 2020 އޭޕްރިލް 2 ވަނަ ދުވަހު އެއްބަސްވުމެއްގައި ސޮއިކުރެވުނެވެ. ނަމަވެސް، ނިމިދިޔަ ސަރުކާރުގައި ޤާއިމްކުރި އެއްބަސްވުމާ އެއްގޮތަށް ވެންޓިލޭޓަރުތައް ފޯރުކޮށްދީފައެއް ނުވެއެވެ.
މި މައްސަލައިގައި ވެންޓިލޭޓަރުގެ އަގަށްވާ ފައިސާއާއި އެއްބަސްވުމާ ޚިލާފުވުމުން ސަރުކާރަށް ލިބުނު ގެއްލުމުގެ ބަދަލު ދައްކަންޖެހޭ ކަމަށް އާބިޓްރޭޝަނުން ވަނީ ކަނޑައަޅާފައެވެ.
