މިއަދުގެ ޙާލަތަކީ އެކުވެރިއަކާއި ބައްދަލުވެގެން ޙާލު އަހައިލިނަމަވެސް ދައްކާނީ ކުރިމަތިވެފައިހުރި މައްސަލަތަކުގެ ވާހަކައެވެ. ެކަމުން އެނގެނީ މައްސަލަތައް ގިނަވެ ފުނިޖެހިފައިވާކަމެވެ. މައްސަލަތަކުން ސަލާމަތް ނުވެވިގެން އުޅެންޖެހިފައިވާ ކަމެވެ.
ﷲ ތަޢާލާ އަންގަވާފައިވާ ގޮތަށް ޢަމަލުކުރެވޭނަމަ އެންމެ މައްސަލަތައް މަދުވާންޖެހޭނީ އަހުރެމެން މުސްލިމުންގެ މެދުގައެވެ. އެހެނަސް މުސްލިމުންގެ މިއަދުގެ ޙާލަތަށް ބަލައިފިނަމަ އެންމެންގެ މެދުގައި މައްސަލަތައް ޖެހި ޝަކުވާތައް މިވަނީ އިންތިހާއަށް ގިނަވެފައެވެ. ދެމަފިރިންގެ މެދުގައި މައްސަލތަކެވެ. ދަރިންނާއި މައިންބަފައިންގެ މެދުގައި މައްސަލަތަކެވެ. ޢާއިލާގެ މެންބަރުންގެ މެދުގައި މައްސަލަތަކެވެ. މުޖުތަމައުގެ އެންމެންގެ މެދުގައި މައްސަލަތަކެވެ.
މިހުރިހާ މައްސަލަތަކާއި ޝަކުވާތަކުގެ ޙައްލު އެންމެ ދެލަފްޒުން މުސްލިމުންނަށް ހޯދެން އެބައޮތެވެ. އެވާހަކަ ދެއްކުމުގެ ކުރިން އެއްކަމެއް ފާހަގަކޮށްލާނަމެވެ. ސުވާލެއް ކޮށްލާނަމެވެ؟
މިސާލަކަށް މިއަދުވެސް ރަސޫލް ﷺ ދުނިޔޭގައި އެބަހުންނެވިއެވެ. ދެމަފިރިއެއްގެ މެދުގައި މައްސަލައެއް ޖެހިގެން ނުވަތަ އެނޫންވެސް ދެމީހެއްގެ މެދުގައި މައްސަލައެއް ޖެހިގެން އެކަމުގެ ޝަކުވާ ރަސޫލް ﷺ އަށް ހުށަހެޅުނީއެވެ. ކުށްވެރިވާ ފަރާތުން ގޮސް އަނިޔާ ލިބުނު ފަރާތުން މަޢާފަށް އެދެން ޙަދީޘްފުޅުކުރެއްވެވީއެވެ. އެކަން ނުކުރާނަން ހެއްޔެވެ؟ މާފަށް އެދުމުން މާފުކުރަން ޙަދީޘްފުޅު ކުރެއްވެވީއެވެ. އެކަން ނުކުރާނަން ހެއްޔެވެ؟
ދެން އޮތް ސުވާލަކީ ކުށެއް ކުރެވިއްޖެނަމަ މާފަށް އެދުމަށާއި މާފަށް އެދުމުން ހިތްހެޔޮކޮށް މާފުކުރަން ރަސޫލް ﷺ ޙަދީޘްފުޅުކުރައްވަވާފައި ނެތީހެއްޔެވެ؟ ސުންނަތް ޤަބޫލުކުރާނަމަ ޢަމަލުކުރަން ތިއަ ފަސްޖެހެނީ ކީއވެގެން ހެއްޔެވެ؟
މީސްތަކުންނޭވެ! ﷲ ތަޢާލާގެ ޙަޟްރަތުގައި ރަސޫލް ﷺ ގެ ސުންނަތް ޤަބޫލުނުކުރުމުގެ ޙުކުމަކީ ރަސޫލް ﷺ ދުނިޔޭގައި ހުންނަވައި އަންގަވާ އެންގެވުން ޤަބޫލުނުކުރުމެވެ. ރަސޫލް ﷺ މިއަދު އަހަރެމެންނާއިއެކުގައި ނެތުމަކީ އެ ޙުކުމަށް ނުވަތަ އެ ސުންނަތަށް އެއްވެސް ބަދަލެއް އަންނަ ސަބަބެއް ނޫނެވެ.
ދެން މިބުނެދެނީ ކުރިމަތިވާ ހުރިހާ މައްސލަތަކެއް ކަމުގައި ފަށަމުން ބުނި ދެލަފުޒެވެ. ދެމަފިރިންގެ މެދުގައިވެސް ޢާއިލާގެ ތެރޭގައިވެސް އަދި އެކަކު އަނެކަކަށް ނަމަވެސް އެއްވެސް މައްސަލައެއް ނުޖެހި އުފަލުގަ އުޅެން ކުރަން އޮތީ ހަމަ އެންމެ ކަންތަކުގެ ވާހަކައެވެ، އެއީ "އިއްތަޤިﷲ" (ﷲ ތަޢާލާއަށް ބިރުވެތިވާށެވެ!) މި ދެ ލަފުޒެވެ.
ތިމާ ބިރުވަތިވަމޭ ބުނުމަކުން އެކަނި ނުފުދޭނެއެވެ. ބިރުވެތިވާކަން ޢަމަލުން ދައްކާނަމަ އެއްވެސް މައްސަލައެއް ކުރިމަތި ނުވާނެއެވެ. އެއްވެސް މީހަކު އެއްވެސް މީހަކަށް އެއްވެސް އަނިޔާއެއް ނުކުރާނެއެވެ. އެއްވެސް މީހަކަށް ދެރަގޮތެއް ނުހަދާނެއެވެ! ހުރިހާވެސް މައްސަލައަކީ ﷲ ތަޢާލާއަށް ބިރުވެތިނުވެވޭ ކަމެވެ.
- ޝައިޚް އަބޫބަކުރު ޒައުދުގެ ދަރުސަކުން
