އިސްލާމީ ކަންތައްތަކާ ބެހޭ ވަޒީރު ޑރ. މުޙައްމަދު ޝަހީމް ޢަލީ ސަޢީދު ވިދާޅުވެފައިވާ ގޮތުގައި، މާލޭގައި އަލަށް ހަދާ ވަޤްފު ޢިމާރާތް ކަމަށްވާ “ދާރުލްއަރްޤަމް” ގެ މަސައްކަތް ފެށުމުން، އިސްލާމިކް ވަޤުފު ފަންޑަށް އަހަރަކު 10 މިލިއަން ރުފިޔާގެ އާމްދަނީއެއް ލިބޭނެއެވެ. ޑރ. ޝަހީމް މިކަން ހާމަކުރެއްވީ، ވަޤްފު ފަންޑު ބިނާކުރުމަށް ސަރުކާރުން ގެންގުޅުއްވާ ދުރުމުސްތަޤްބަލުގެ ވިސްނުން ހާމަކުރައްވަމުންނެވެ.
އެމަނިކުފާނު މިކަން ހާމަކުރެއްވީ ސޯޝަލް މީޑިއާގައި ކުރެއްވި ޕޯސްޓެއްގައެވެ. މި ޕޯސްޓުގައި ޑރ. ޝަހީމް ވިދާޅުވީ، ދާރުލްއަރްޤަމް އަކީ ރާއްޖޭގެ ދެވަނަ ޒަމާނީ ވަޤްފު ބިނާ ކަމަށާއި، މި ބިނާގެ އަމަލީ މަސައްކަތް ފެށުމުގެ އެއްބަސްވުމުގައި ސޮއިކުރުމަށް ހަމަޖެހިފައިވަނީ 26 އޮކްޓޯބަރ 2025 ގައެވެ. މި މަޝްރޫޢުގެ ސަބަބުން އިސްލާމިކް ވަޤުފު ފަންޑު މާލީ ގޮތުން ހަރުދަނާވުމަށް ބޮޑު އެހީތެރިކަމެއް ލިބިގެންދާނެ ކަމަށް ޑރ. ޝަހީމް ވަނީ ޔަޤީންކުރައްވާފައެވެ.
މިފަދަ މަޝްރޫޢުތައް ތަންފީޒުކުރުމުގެ މަޤްޞަދަކީ، ދީނީ ޚިދުމަތްތައް ފުޅާކުރުމަށް ދައުލަތުގެ ބަޖެޓަށް ބަރޯސާވުމުގެ ބަދަލުގައި، ވަޤްފު ފަންޑުގެ އަމިއްލަ އާމްދަނީއަށް ބިނާކޮށް މިކަންތައްތައް ކުރިއަށްގެންދިއުމުގެ މަގު ފަހިކުރުމެވެ. މި ދެމެހެއްޓެނިވި އާމްދަނީގެ ނިޒާމުގެ ސަބަބުން ދީނީ ކަންތައްތައް މެދުނުކެނޑި ފުޅާކުރެވޭނެކަމަށް ސަރުކާރުން އުއްމީދުކުރައްވައެވެ.
ދާރުލްއަރްޤަމްގެ އިތުރުން ސަރުކާރުން ވަނީ ހުޅުމާލޭގައިވެސް ބޮޑު ވަޤްފު ޢިމާރާތެއް އެޅުމަށް ނިންމަވާފައެވެ. އެ ޢިމާރާތަށް ނަން ދީފައިވަނީ “ދާރުއްސަލާމް” ގެ ނަމުންނެވެ. މި ދާރުއްސަލާމް ޢިމާރާތަކީ ދާރުލްއަރްޤަމްއަށްވުރެ އާމްދަނީ ބޮޑުކަމަށް ލަފާކުރެވޭ ބިނާއެކެވެ. ސަރުކާރުން ލަފާކުރައްވާ ގޮތުގައި ދާރުއްސަލާމް އިމާރާތުން އަހަރަކު 50 މިލިޔަން ރުފިޔާ ވަޤްފު ފަންޑަށް ލިބޭނެއެވެ.
ކުރިއަށް އޮތްތަނުގައި މި ދެ ޢިމާރާތުގެ މަސައްކަތް ނިމި، އާމްދަނީ ލިބެން ފެށުމުން، އިސްލާމިކް ވަޤުފު ފަންޑަށް އަހަރަކު ޖުމްލަ 60 މިލިއަން ރުފިޔާގެ އާމްދަނީއެއް ލިބިގެންދާނެއެވެ. މިކަމުގެ ސަބަބުން މުޅި ރާއްޖޭގައި ދީނީ ޚިދުމަތްތައް ފުޅާކުރުމަށް ބޭނުންވާ މާލީ ވަސީލަތްތައް އިތުރުވެ، އިސްލާމީ މަސައްކަތްތަކަށް އިންޤިލާބީ ބަދަލެއް އަންނާނެކަމަށް ލަފާކުރެވޭއެވެ.
