ޖުޑީޝަލް ސަރވިސް ކޮމިޝަން (ޖޭއެސްސީ) އިން ކްރިމިނަލް ކޯޓުގެ ޤާޟީ ޙުސައިން ފާއިޒް ރަޝާދާ ގުޅޭގޮތުން ތަޙުޤީޤު ކުރަމުންދާ މައްސަލައަކާ ގުޅިގެން، ވަޒީފާއިން ސަސްޕެންޑުކޮށްފިއެވެ.
ޖޭއެސްސީން ވިދާޅުވީ، ޤާޟީ ފާއިޒް ސަސްޕެންޑްކޮށްފައިވަނީ އިއްޔެއިން ފެށިގެން، 60 ދުވަހުގެ މުއްދަތަކަށް ކަމަށެވެ. މިއީ ޤާނޫނުގެ ދަށުން ފަނޑިޔާރަކު ވަޒީފާއިން ސަސްޕެންޑްކުރެވޭނެ އެންމެ ދިގު މުއްދަތެވެ. މި މުއްދަތުގެ ތެރޭގައި އެ މައްސަލައިގެ ތަޙުޤީޤު ނިންމައި ވަކި ގޮތެއް ކަނޑައެޅުމަށް ކޮމިޝަނުން މަސައްކަތް ކުރާނެއެވެ.
ޤާޟީ ފާއިޒް ރަޝާދާ ގުޅޭގޮތުން ތަޙުޤީޤު ކުރަމުންދާ މައްސަލައިގެ ބާވަތަށާއި، ތަޙުޤީޤުން މިހާރު ހޯދިފައިވާ މަޢުލޫމާތުތަކަށް ބަލައި ނިންމާފައިވާ ނިންމުމެއް ކަމަށް ޖޭއެސްސީގެ ބަޔާނުގައި ވެއެވެ. ޖުޑީޝަލް ދާއިރާގެ ހައިބަތާއި އިތުބާރު ދެމެހެއްޓުމަކީ މިފަދަ ކަންކަމުގައި އަބަދުވެސް އިސްކަންދޭ އަސާސެއް ކަމަށް ކޮމިޝަނުން ފާހަގަކުރިއެވެ.
މި ސަސްޕެންޑުކުރުމުގެ ސަބަބުން، ޤާޟީ ފާއިޒް ވަކި ގޮތެއް ކަނޑައަޅަންދެން ކްރިމިނަލް ކޯޓުގެ އެއްވެސް މަސައްކަތަކަށް ނުނިކުމެ، ވަޒީފާއަށް ނުނިކުމެ މަޑުކުރުމަށް ވަނީ އަންގާފައެވެ.
މި ނިންމުމަކީ ޝަރުޢީ ދާއިރާގެ އިތުބާރު ނެގެހެއްޓުމުގެ އަސާސުގެ މައްޗަށް ބިނާކޮށް ނިންމާފައިވާ ނިންމުމެއް ކަމަށް ޖޭއެސްސީން ވަނީ ހާމަކޮށްފައެވެ.
