ޒުވާނުން ބާރުވެރިކޮށް، އެމީހުންނަށް މަސައްކަތުގެ ދާއިރާގައި ތަމްރީނުތައް ފޯރުކޮށްދިނުމުގެ މުހިންމު މަޤްޞަދުގައި، މޯލްޑިވްސް ޕޯޓްސް ލިމިޓަޑް (އެމްޕީއެލް) އާއި ޒުވާނުން ބާރުވެރިކުރުވުމާއި މައުލޫމާތާއި ފަންނާއި ބެހޭ ވުޒާރާއާއި ދެމެދު ވެފައިވާ ފަހުމުނާމާ އިތުރު 3 އަހަރަށް އައުކޮށްފިއެވެ.
މި ފަހުމުނާމާ އައުކުރުމުގެ ސަބަބުން، ޒުވާނުންނަށް މަސައްކަތުގެ ތަޖުރިބާ ހޯދުމުގެ ފުރުޞަތުތައް އިތުރަށް ފުޅާވެގެންދާނެއެވެ.
ފަހުމުނާމާ އައު ކުރުމުގެ އެއްބަސްވުމުގައި ސޮއިކުރުމުގެ ރަސްމިއްޔާތު ބާއްވާފައިވަނީ އެމްޕީއެލްގެ ހެޑް އޮފީހުގައެވެ. މި ރަސްމިއްޔާތުގައި، ޒުވާނުން ބާރުވެރިކުރުވުމާއި މައުލޫމާތާއި ފަންނާއި ބެހޭ ވުޒާރާގެ ފަރާތުން ސޮއިކުރެއްވީ ސްޓޭޓް މިނިސްޓަރ ޢަލީ ޝައްމާނެވެ. އަދި އެމްޕީއެލްގެ ފަރާތުން ސޮއިކުރެއްވީ ޗީފް ލަރނިންގ އެންޑް ޑިވެލޮޕްމަންޓް އޮފިސަރ އައިޝަތު ޝިމްލާއެވެ.
މި ފަހުމުނާމާގެ މައިގަނޑު މަޤްޞަދަކީ، ޒުވާނުންނަށް ޤައުމީ ފެންވަރުގެ ތަޢުލީމް ފޯރުކޮށްދިނުމުގައި، މަސައްކަތުގެ ތަމްރީނު އަދި މަސައްކަތުގެ ތަޖުރިބާ ހޯދުމުގެ ފުރުޞަތުތައް އިތުރުކުރުމެވެ. މިގޮތުން، ޒުވާނުންގެ ހުނަރުތައް ތަރައްޤީކޮށް، ވަޒީފާގެ ބާޒާރަށް ތައްޔާރުކުރުމަށް މި އެއްބަސްވުމުގެ ދަށުން ގިނަ މަސައްކަތްތަކެއް ކުރެވޭނެއެވެ.
މި އެއްބަސްވުމުގެ ދަށުން، އެމްޕީއެލްއިން ވަނީ ކަނޑައެޅިފައިވާ ވަކިވަކި ދާއިރާތަކުގައި ޤައުމީ އެޕްރެންޓިސްޝިޕް ޕްރޮގްރާމް ކުރިއަށް ގެންދިއުމަށް ހަމަޖައްސާފައެވެ. މި ޕްރޮގްރާމްތަކުގެ ސަބަބުން، ޒުވާނުންނަށް ޢަމަލީ ތަޖުރިބާ ލިބި، އެމްޕީއެލްގެ މަސައްކަތްތަކާ ގުޅުންހުރި ފަންނުތަކުގައި ފަރިތަކަން ލިބިގެންދާނެއެވެ. މި ފަހުމުނާމާ އައުކުރުމަކީ ޤައުމީ ތަރައްޤީއަށް ޒުވާނުންގެ ބައިވެރިވުން އިތުރުކުރުމަށް އެޅުނު މުހިންމު ފިޔަވަޅެކެވެ.
