ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، އައްޑޫ ސިޓީގެ ހުޅުމީދޫއަށް މިއަދު ވަޑައިގެންނެވުމުން، އެ ސަރަޙައްދުގެ ރައްޔިތުންނާއި މުއައްސަސާތަކުގެ އިސްވެރިން ވަނީ އެމަނިކުފާނަށް ހޫނު މަރުޙަބާއެއް ދަންނަވާފައެވެ. ރައީސްގެ މި ދަތުރުފުޅަކީ ރައްޔިތުންނާ ގާތުން ބައްދަލުކުރައްވައި، އެމީހުންގެ ބޭނުންތައް ދެނެގަތުމަށް ކުރައްވާ ސިލްސިލާ ދަތުރުފުޅުތަކުގެ އެއްބަޔެވެ.
ރައީސުލްޖުމްހޫރިއްޔާއަށް މަރުޙަބާ ދެންނެވުމަށްޓަކައި ހުޅުމީދޫގައި ވަނީ ޚާއްސަ ތައްޔާރީތަކެއް ކުރެވިފައެވެ. އެގޮތުން، އެކި ޢުމުރުފުރާތަކުގެ މީހުންނާއި ސަރުކާރުގެ މުއައްސަސާތަކުގެ އިސްވެރިންގެ ބޮޑު ކިއޫއެއް އެމަނިކުފާނަށް މަރުޙަބާ ދެންނެވުމަށް ހަދާފައި ހުއްޓެވެ. މި މަރުޙަބާގެ ސަބަބުން ރައީސް މުޢިއްޒުއަށް އެ ސަރަޙައްދުގެ ރައްޔިތުންގެ ފަރާތުން ލިބިވަޑައިގެންނެވި ތާއީދު ފާޅުވެގެންދިޔައެވެ.
މި ދަތުރުފުޅުގައި ރައީސުލްޖުމްހޫރިއްޔާ ވަނީ ހުޅުމީދޫގެ ރައްޔިތުންނާ ބައްދަލުކުރައްވައި، އެ ރައްޔިތުންގެ ހާލު ބައްލަވާނެ ކަމަށް ވަނީ ހަމަޖެހިފައެވެ. އަދި ރައްޔިތުން ބޭނުންވާ ކަންކަމުގެ އަޑު އައްސަވައި، އެ ރަށްރަށަށް ކުރައްވާ ތަރައްޤީގެ ތަސައްވުރު ރައީސުލްޖުމްހޫރިއްޔާ ޙިއްސާކުރައްވާނެއެވެ. މީގެ މަޤްޞަދަކީ ރައްޔިތުންގެ ހުރިހާ ބޭނުންތަކެއް ސީދާ އެމީހުންގެ ފަރާތުން ދެނެގަތުމަށް ފުރުޞަތު ދިނުމެވެ.
މި ދަތުރުފުޅަކީ ރައީސުލްޖުމްހޫރިއްޔާގެ ވައުދުފުޅާ އެއްގޮތަށް، ރާއްޖޭގެ ހުރިހާ އަތޮޅަކަށް ޒިޔާރަތްކުރެއްވުމަށާއި އަތޮޅުތަކާއި ރަށްތަކާއި ސިޓީތަކުގެ ކައުންސިލުތަކާ ބައްދަލުކުރެއްވުމަށް ކުރިއަށްގެންދަވާ ސިލްސިލާ ދަތުރުފުޅުތަކުގެ ތެރޭގައި ހިމެނިގެން ކުރައްވާ ދަތުރުފުޅެކެވެ. މިފަދަ ދަތުރުފުޅުތަކުގެ ސަބަބުން ސަރުކާރާއި ރައްޔިތުންނާ ދެމެދު ގުޅުން ބަދަހިވެ، ލާމަރުކަޒީ ނިޒާމު ހަރުދަނާވުމަށް މަގުފަހިވާނެއެވެ.
